Petrochina ta desmenti cualkier deal cu Valero
ORANJESTAD (AAN): Ayera a sali publica den China Daily y Taiwan Post un articulo encuanto e posicion di China den e mercado di petroleo na unda cu e tin interes den 3 proyecto pafor di China. Uno pa Asia na Singapore y e otro na Europa basa na Londres cu ya ta concretisando.
E Presidente di PetroChina Jiang Jiemin a trata di desvia periodistanan internacional encuanto cu PetroChina tin negosacionnan andando cu Valero pa cu compra di e refineria na Aruba. El a remarca cu si e ta willing pa mira den e posibilidad di e proyecto pero no ta conciente di cualkier deal den esaki.
DIARIO a trata di drenta den contacto cu Minister Mike de Meza, pero a worde bisa cu e ta sufri di quebrante di salud. DIARIO kier desea e mandatario pronto recuperacion.
Loke no por kita afor ta cu e gobierno aki ta haciendo todo por todo pa tene e refineria habri. Esey ta un reconocemento cu ningun hende por kita, y DIARIO ta desea e gobierno exito riba nan intento. Sinembargo e ta hopi importante pa scucha otro instancia of persona y pa tene cuenta cu “errornan” cu a worde haci den pasado den e acuerdo sera cu Valero pa un proximo acuerdo cu ta salvaguardia interes y bienestar di e pais aki cu mester ta na prome lugar. Den esaki si e refineria sera cu Aruba ta recobra e tereno y no pa duna un periodo extendi di 3 aña manera ta e caso cu Valero.
Tanto PetroChina y PDVSA tin interes den e refineria na Aruba pero tin un otro opcion cu ta Hovensa cu tin mas capacidad di transhipment cu Aruba. Un refineria cu por procesa tambe e crudo pisa di Venezuela y mirando cu PDVSA ta doño di dje den consorsio cu Hess.
Pues kisas ambos por scohe Aruba of Hovensa separadamente of tin e otro posibilidad pa tuma tur dos hunto y asina engrandece e capacidad di refinacion cu China tin tanto mester di dje. Na 2011 PetroChina su capacidad di procesa crudo a subi cu 18.2%, cu ta equivalente na su output di crudo y gas riba mercado internacional di 120.8 miyon bari cu tambe a conoce un crecimento di 9.4%.
Loke cu PetroChina kier logra un crecimento stabil cu na 2015 esaki ta nifica un aumento den crudo domestico di 110 miyon ton (14.03 miyon bari) cu ta un crecimento di 4.6% di e nivel di aña pasa.
