Diario Online

Polis ta prefera para pa un chofer coriendo cu un luz envez di atende caso serio di maltrato domestico!

Publication: Tuesday, 22 May 2012. Categoria: Policial

ORANJESTAD (AAN) – Na redaccion di DIARIO nos a ricibi bishita di un ciudadano, cu a trece dilanti un situacion cu e ta haya incorecto di parti di algun miembro di Cuerpo Policial. E dama, cual nomber ta keda pa redaccion, a comenta lo siguiente:

“Diasabra ultimo nos tabata core den Arendsstraat pa  mas o menos 8 or di anochi.
Nos a wak un homber ta maltrata su pareha. E tabata ranca y pusha e senora bastante bruto.
Mi casa a grita e homber  pa e stop.

Den prome instante nos a sigui bay, pero nos a keda wak patras, ora nos a wak e homber a sigui maltrata
e señora nos a bay back.
Ora nos a yega cerca, mi a puntra e señora si e ta o.k., e homber a contesta cu si pero e señora a yora cu no,  el a contesta cu su pareha  ta maltrate y el a  bisa cu su pareha ta bay mate.
Mi a puntra e señora si mi mester yama polis, e ora e homber a spanta y cana bay y e señora a keda atras. Nos a bay para e auto banda e señora  y el a bisa nos danki pero e no kier yama polis pasobra e homber ta bay mate. El a conta nos cu el a bisa su pareha cu e no kier sigui cu nan relacion   pesey e homber ta maltrate.
Atrobe nos a puntra e senora si e kier pa nos hibe na warda di polis of si kier un lift pa un otro lugar pero e señora no tabata kier.
Nos no por a haci nada pe, y nos a cuminza bay.
Nos a topa e homber ta bin back cu un cara masha furioso mes, atrobe nos a bay back y net dilanti e funeraria  e homber a cuminza atrobe, e ora mi a dicidi di yama polis.
Mi a splica polis kico ta pasando  y nan a bisa mi nan ta bay manda un patruya.
Nos a keda warda y e homber a sigui pusha y ranca e senora,  diripiente nan a drenta den un cura di cas dilanti di Witec  / Oranjestad Laundry.

Despues  di 15 minut  nos  topa un patruya di polis dilanti di e  funeraria.
Mi a baha for di auto y splica e polis full e caso y mustra nan unda e pareha a drenta den cura.
Nan a bisa mi cu nan ta bay tira un bista.

Manera mi a caba di conta e storia na e polis cu ta sinta na banda, e polis chofer  a baha for di e auto. Keriendo cu e polis ta bay na e cas na pia pa atende cu e caso di maltrato,  pa nos sorpresa e polis a dicidi pa para  un auto cu tabata core cu 1 luz so.

Den  shock di a wak cu e polis ta duna  prioridad na un persona cu ta core auto cu 1 luz  envez di atende cu un señora, cu podise ta bringando pa su bida, nos a cuminza core atrobe y a bay para un tiki mas pabou  pa wak kico lo pasa.
Ora e polis a caba di atende cu e chofer, nan a subi nan auto y pa nos sorpresa atrobe, na lugar di bay atende cu e maltrato di e señora nan a bay direccion di Playa. 
Nos mes no por a kere nos wowo,  increible!
Nos a bay nan tras pa check ki number di auto nan tin. Ora nos a yega cerca nos a wak cu e number tabata  D-545. Esey  tabata  8:45 di anochi.
Y cu e informacion  ey,  nos a bay di biaha warda di polis pa informa e wachtcommandant  di loke nos a caba di experiencia

E wachtcommadant  (meneer  Sabajo)  a  yama centrale y a informa e centrale pa manda e patruya atrobe pa atende cu e maltrato di e señora.

Mi pregunta ta kico awor si e homber berdad a mata e señora?
Nos a haci trabao como bon ciudadano, pero polis a haci net nada den e caso ey.

Ora nos a sali for di warda di polis nos a bolbe pasa den Arendsstraat y berdad nos a wak un patrouille banda di e cas.

Mi ta spera e señora ta ok. Ta duel mi masha  hopi  como un muher pa wak cosnan asina, y sigur  un señora cu tin asina miedo cu e no ni  kier duna keho na polis of haci algo pa yuda su mes.

Mi ta spera comisario Dolfi Richardson tuma nota di e caso aki y atende e dos polisnan balente riba nan responsabilidad  como polis”, e dama a expresa.