Porfin Pueblo por cumpra coriente sistema pre-pago
Andin Bikker, Democracia Real:
ORANJESTAD (AAN): Prome cu Partido Democracia Real (PDR) a logra drenta Parlamento su lider mr. Andin Bikker tabata boga pa introduccion di meternan prepago: e meternan aki ta yuda e consumidor maneha su presupuesto di coriente y evita cu e ta worde sorpresa cu cobransanan cu e no por paga.
Una bes den Parlamento Andin Bikker a presenta na aña 2010 un pre-concepto di ley pa yuda Pueblo maneha su gastonan di coriente (“Landsverordening beheersing kosten energie”).
Den e pre-concepto di ley, cual ta na Directie Wetgeving, tambe Andin Bikker ta promove introduccion di meternan pre-pago. Andin Bikker tambe a organiza varios reunion informativo riba e tema den e Comision encarga cu Companianan Estatal, cual e ta presidi.
Na juni 2011 Andin Bikker a presenta un mocion pa introduccion di 2000 meternan prepago. E mocion a keda aproba unanimamente den Parlamento. Na februari 2012 Andin Bikker a sigui insisti riba e tema door di introduci un amienda pa medio di e Presupuesto Alternativo di PDR, den cual ta crea fondonan pa un proyecto piloto pa intruducion di meternan pre-pago.
E Presupuesto Alternativo a worde adopta grandemente den un nota di cambio y fondonan substancial a worde reserva pa e proyecto piloto aki. Pues ta cu sumo placer fraccion di PDR a tuma nota di e anuncio di Elmar cu a introduci meternan pre-pago pa medio di un proyecto piloto.
Ta un logro grandi pa Pueblo, cual a bira un realidad entre otro danki na e perseverancia di mr. Andin Bikker di PDR riba e tema. Awor PDR ta bay sigui concentra riba rebaho di invoerrechten riba airconan y otro aparatonan cu traha cu tecnologia “inverter” y tambe lusnan LED.
Democracia Real ta cumpli!
