Prome Minister lo reuni cu Conseho di Ministro y cada sindicato den su seno despues lo tuma decision

Publication: Wednesday, 23 May 2012. Categoria: General

Rudy Geerman di FTA, tocante Dialogo Social:

 
ORANJESTAD (AAN) – Matutino DIARIO a entrevista e sindicalista Rudy Geerman, lider di e Federacion di Trahadornan di Aruba “FTA”, tocante e preocupacion cu e sindicatonan tin relaciona cu Dialogo Social, cu no ta haya e sosten di tur Minister.

Rudy Geerman a informa nos cu FTA a manda un carta pa Prome Minister den cual nan ta bise cu e sindicato ta convenci cu e ta kere den Dialogo Social, pasobra si no, e no a bin cu esaki.

FTA a señala pa Premier Eman cu e Dialogo Social te aworaki ta carga realmente pa dos minister so cu ta su persona como Minister di Asuntonan General y pa Minister di Finanzanan Mike de Meza.

Tambe a mustra e dignatario cu un Dialogo Social no mester ta solamente bin sinta na mesa cu e partidonan envolvi pero mester tin e spirito di e Dialogo Social y cu esaki no ta kita ningun hende su derecho, pero e ta un vehiculo pa un bon comunicacion.

FTA ta sinti cu esaki no ta e caso pasobra ora tin un tema cu mester worde discuti cada minister ta tuma su propio rumbo y ta perde tur e filosofia di loke mester ta un Dialogo Social.

Despues di esey FTA a haya un carta di gobierno den cual ta splica cu nan kier continua cu e Dialogo Social, y nan a contesta cu mirando cu nan no ta mira un cambio ni a haya reaccion nan lo no participa den e Dialogo Social.

Diamars Minister Presidente a yama tur sindicato y tur nuebe tabata presente, y nan tur a expresa nan preocupacion y a señala cu tur ta kere den e dialogo social pero esaki mester ta realmente estructura, unda cu tur hende ta cargue.

E siguiente encuentro ta entre gobierno y tur sindicato hunto y akinan lo tuma un decision. Aworaki cada sindicato ta bay den nan seno pa discuti y bin hunto pa wak den ki direccion nan lo bay.

Geerman a menciona cu Prome Minister tin tambe su responsabilidad y aworaki e tin cu bay papia cu Conseho di ministronannan y e sindicato di nan banda tambe ta bin hunto, y despues nan lo reuni cu gobierno pa wak kico ta bay pasa.

E lider sindical a bisa cu FTA ta un di e principal cargadornan di Dialogo Social, y for di aña 2000 caba nan tabata papia y boga pa esaki. Semper nan a kere den e pensamento ey pero mester dune un contenido real y no por ta asina cu ora e ta beneficia bo si, y otro ora no.

Leave a Reply