Diario Online

Protesta politico contra e molinanan

Publication: Wednesday, 23 May 2012. Categoria: Politica

Analisis politico

Ainda pa hopi hende ta  incrompendibel cu un paar di persona  serio a bay tras di Evelyn Wever Croes pa politicamante protesta contra e molinanan di biento cu lo mester bin pa alivia e situacion di presion ariba prijs di electricidad pa motibo di subimeneto di costo di crudo.

   Ocho aña largo gobierno di MEP a destrui nos pais cu un maneho corupto y  maligno y nunca nos a tende un protesta di e mesun hendenan aki. No pasobra nan no a mira e disaster cu MEP tabata causando pero simplemente pa miedo di e character  vengativo di e dirigentenan di MEP. Contra un gobierno di AVP si  nan ta cla di biaha pa protesta sabiendo cu AVP ta otro y no ta bay castiga esnan cu a protesta.

   Awo despues di e demostracion ta resulta cu ni un decision a worde tuma ainda unda y ki dia e molinanan mester worde instala pero ya caba MEP a cuminza kibra aparatonan costoso pa mustra manera semper nan agresividad sin argumentonan sano. E datonan cu nan a trece tabata completamente falso. Molinanan di un tamaño cu absolutamente no ta corecto a worde mustra pa spanta hende. Storianan cu paharonan lo dal den e molinanan ta mentira prueba cu hechos. Tabatin hende den e protesta cu sa esaki masha bon. Mas informacion cu nan a duna tampoco tabata cuadra cu e berdad pero asina mes nos a tende cu hasta Obispo a mete den e asunto politico aki.

   Nos ta sumamente satisfecho cu e declaracion cu e Pastor a duna cu a mustra cu e  argumentonan duna no tabata cuadra cu realidad y cu ningun momento e ta haya cu mag pone religion den e asunto netamente politico aki. Loke nos ta mira na Aruba atrobe ta duna motibo pa ta preocupa. Un par di dia pasa nos a mira un Camera di Comercio organiza un encuentro grandi caminda e oradornan a defende e punto di bista cu e refineria di nos no mester habri mas.

   Na 1986 nan kier a mata e gobernantenan cu kier a usa por lo menos 400 miyon Dollar di Exxon pa haci e citio di Lago limpi y cuminza cu actividadnan economico nobo y limpi ariba e tereno ey. MEP a drenta gobierno y a regala Coastal e refineria y Aruba no tin ningun claim mas pa financia e hacimento limpi di e tereno di Lago. E tempo ey Aruba a siña biba sin Lago caba pero entre otro e dirigentenan di Camera di Comercio  despues cu Lago a cera tabatin un fobia cu Lago mester a habri back y esey a causa cu desde e tempo ey un mal deal a worde cera cu Coastal cu te awe nos ta sinti e consecuencianan. Awo tin un situacion completamente diferente si e refineria no keda habri e tin un efecto defastador pa hopi hende.

   Ta pesey MEP tabata di fiesta cu e anuncio di Valero cu nan no por sigui operacion mas. Ta di spera cu nos gobierno por logra di tene e refineria habri en todo caso pa un cierto cantidad di aña. E actitud di e hendenan cu a bay protesta hunto cu Evelyn Wever Croes lider di MEP ta pone cu ta parce cu ta e mesun mentalidad ainda tey cerca un paar di hende. Ta e mesun mentalidad aki a kibra e race track cu lo tabata un salbacion pa e desaroyo economico di Sanicolas. Awe ainda ta di yora cu e proyecto aki no a bay door. Ta e mesun tipo di protesta nos ta mira contra e molinanan di biento.

   Ningun argumento rational y sano pero argumentonan partidista y di dos of tres directamente propio interes cu posiblemtente for di nan cas por mira un pida di un di e molinanan. Naturalmente gobierno mester tende e obhecionnan y mira kico si ta un problema di berdad y kico ta solamente accion  politica partidista. Nos lo keda enfatiza cu e mentalidad destructivo di MEP lo ta fatal pa Aruba si un dia nan mester drenta den gobierno atrobe. Evelyn durante e protesta a demostra esaki claramente y ta di spera cu no tur esnan cu tabata den e protesta cu MEP lo sigui den e direccion aki y cu nan lo realiza na tempo kico e consecuencianan lo por ta pa nos isla.