Pueblo a bira mas conciente pa loke ta prevencion di dengue den nan cas
Rudolf Werleman, inspector di Salud Publico:
ORANJESTAD (AAN) – Matutino DIARIO a entrevista señor Rudolf Werleman, ken ta traha den e seccion di Supervision di Departamento di Salubridad Publico. Hunto cu GKMB, e ta tumando parti den e proyecto Bo Bario, cu e biaha aki a bay Companashi.
El a duna di conoce cu nan a keda cla cu e distrito di San Nicolas y Savaneta y awor ta cuminza cu e zona di Oranjestad. Akinan tin 12 zona y nan a inicia cu zona 8 den cual Companashi ta cay. Nan ta controla e casnan unda cu tin mata y pa wak si tin bas cu awa cu por crea e larva di e sangura cu ta causa dengue. Pa loke ta trata concientizacion den pueblo e ta mira cu comunidad ta cooperando basta bon, pero e ta sinti cu ainda e por bay mehor. Awor tin un control riba henter Aruba unda cu por contene awa, y den renbak unda nan por tira pisca nan ta haci esaki. Nos ta den tempo di secura aunke e barinan no ta yena cu awa, mester wak pa no tin awa bao di e matanan paden of pafo di cas.
E ciudadanonan den e bario ta haya folders cu ta guia nan riba e prevencion y aunke e secure ta hunga un rol grandi cu e situacion di criadero a baha, hopi hende ta birando hopi mas conciente di locual nan ta haciendo awor cu e matanan cu awa.
Aki aya ainda nan ta haya casonan urgente pa loke ta peligro di dengue y Salubridad Publico ta atende nan tur y si ta wordo constata cu tin un hende cu dengue, mesora nan ta bati na porta di GKMB y ta tuma accion den tur e casnan den e vecindario. Si ta asina cu nan ta haya melding un tiki laat tin biaha, unda cu ora nan bin ya e persona a bira bon te bay traha caba y esey ta un di e problemanan cu nan tin.
