Home General Repsol a bin busca delegacion importante di Aruba relaciona cu exploracion di...

Repsol a bin busca delegacion importante di Aruba relaciona cu exploracion di Gas

6
0
SHARE
- Advertisement -

ORANJESTAD (AAN): Un delegacion di Aruba entre nan ing Minister Mike de Meza tambe director di Compania Arubano di Petroleo CAP, conseheronan legal y miembronan di e top di Utilities NV a sali pa British Guyana.
Minister Mike de Meza a bay New York pa un dia bin back pa e reunion importante y fructifero cu Petro China. Awor e ta cla pa sali sigui atende asuntonan importante pa Aruba manera exploracion di gas.
E mandatario de Meza ta encabeza e delegacion pa Guyana. Manera ta conoci Aruba ta trahando tambe pa cuminsa sondea e posibilidadnan pa explora gas den nos awanan. Tres compania cu tabata interesa a resulta cu Repsol ta esun cu e chens di mas grandi pa ehecuta e trabaonan mirando nan interes.


E combersacionnan di exploracion ta birando uno mas serio y a base di esey mes Repsol a manda un representante Aruba. Pa algun siman caba nan a prepara y invita gobierno di Aruba y CAP pa un viahe pa bin mira e facilidadnan cu nan tin pa explora gas na Guyana.

E preparacionnan a worde haci y asina diahuebs mainta Repsol a manda su avion priva pa busca e delegacion. Durante e bishita na Guyana e delegacion entre nan ing Mike de Meza lo ser hiba cu helicopter riba un boor toren.

Lo haya un splicacion completo for di ehecutivonan di Repsol con e proceso di exploracion y perforacion ta canando eynan. Tambe lo cuminsa fiha e fechanan y posibel palabracionnan teniendo cuenta cu diferente aspecto legal pa bin haci cierto testnan.
Ainda e dia no tey pa explora pasobra tin un proceso largo di testnan cu mester tuma lugar. Repsol mes ta carga cu e costonan pasobra ta algo cu ta costa hopi miyones cu Aruba sigur no ta cla pa e inversion.

Tin biaha por yega asina leu te hasta cu no tin nada den nos suelonan. Pero pesey mes resultado di testnan lo bay bisa esaki. Na mes momento apart di e reunion na un planta di gas y bishita na e boor toren, minister Mike de Meza lo topa cu prome minister di Guyana y tambe e minister di Energia.

Aki tambe lo tin combersacionnan riba nivel di gobierno pa asina haya un bista riba posibel acuerdo di cooperacion manera cualkier otro pais. Diahuebs e delegacion a bay den oranan di mainta y diabierna mes nan lo tey back.

- Advertisement -

DUNA COMENTARIO

Please enter your comment!
Please enter your name here