Sala completamente yen durante reunion publico relaciona cu Urirama
ORANJESTAD (AAN): Prome cu bahada di solo alrededor di 60 ciudadano preocupa cu e desaroyonan rond di binimento di e di dos Parke di Molina di biento situa na Urirama a atende na e reunion publico teni na Dr. Edward Cheung Center for Innovation.
Intencion ta pa duna mas tanto splicacion y informacion posibel na tur esunnan interesa, riba e efectonan pa cu un parke di molina di biento. Henk Hutting di Vaderpiet N.V. a habri e anochi introduciendo su mes na e publico presente. Hutting a remarca cu e reunion publico ta uno voluntario organiza pa e compania cu tin e proyecto di Urirama bou su encargo. E anochi a sigui cu presentacion di experto di KEMA.
Publico presente a reacciona basta indigna pa cu e cifranan presenta durante e reunion. Segun analisisnan haci door di KEMA, e molester di sonido door di e turbinanan ta for di 38 te cu 43db te cu maximo di 45db ora di hopi biento. A midi e efecto di sonido na e cas di mas cerca, y a sali afo cu e sonido ta algo menos.
E investigacion tambe a analisa hunto cu algun experto riba e cantidad di pahra cu por keda afecta cu e proyecto. E resultado tabata cu lo tin poco efecto pa parhanan y mescos pa ratonnan di anochi, conoci tambe como vleermuis.
Na final di e presentacion e publico a haya chens di haci pregunta. Mester menciona cu tabatin basta desordo den sala durante e seccion di pregunta. Prome cu e reunion gruponan entre otro politico a pidi tur hende pa tey na ex ATA banda di oficina di abogado parlamentario Evelyn Croes pa asina nan sali na pia direccion pabao unda e reunion a tuma lugar.
E yamada masal tur e dianan aki via blackberry etc cu MEP tabata haciendo y tambe partido RED no a haya asina hopi sosten pa finalmente yena e sala cu 60 hende.
