Wilhelminastraat lo worde desvia y ta bay sali den Schelpstraat
Debi cu a cera Havenstraat sin “salida”…
ORANJESTAD(AAN): Hunto cu DOW a sinta mira kico ta e cambio cu por worde haci pa cu e trafico. Richard Kramers encarga cu e situacion di trafico el a splica cu nan a yega na cierto conclusion. E fluho di trafico mester keda move. E trafico den Schelpstraat lo cambia y bay direccion pabao. No por bin ariba mas por lo pronto pendiente e trabaonan cu mester termina den Havenstraat. Pa motibo di un mal comprondemento Havenstraat a worde cera y a bin un congestionamento enorme. E fluho di Wilhelminastraat no por a atende of worde guia pa bay L.G. Smith Blvd. A yega na e conclusion cu si Havenstraat ta cera, mester manda e trafico pa asina e fluho por keda move den centro di Oranjestad, via di Kazernestraat (cu diripiente awor ta worde yama “verlengde di Emmastraat”), pasa banda di La Linda, drenta Schelpstraat, den direccion contrario.
Lo cambia e direccion di Schelpstraat temporalmente mientras cu trabaonan ta worde haci den Havenstraat. No ta permiti ningun tipo di trafico pa drenta Schelpstraat via Weststraat pa bay direccion di la Linda. E trafico lo ta den direccion contrario. Esaki mirando e trabaonan cu ta bay tin riba Havenstraat.
E trafico cu ta bin for di Emmastraat ta pasa banda di e trafico cu ta bin for di Wilhelminastraat y esey por drenta Klipstraat sin ningun problema pa bay direccion di Ooststraat y pa bay Nieuwstraat, cu ta e caya patras di exInterbank bay direccion di Kabinet di Gouverneur.
Ta spera cu e cambionan temporal aki lo por yuda suavisa e situacion den trafico cu tin den Oranjestad. Cuerpo Policial ta comprende cu e situacion ta un poco problematico caba, mirando e cambio cu a bin ultimo temponan, pero mirando e trabaonan cu tin pa e fluho di trafico por sigui y pa tin e area cu e trafico ta moviendo, e cambionan aki mester tuma luga.
Polis a papia cu DOW y nan lo habri e area di Havenstraat back ora e trabaonan keda cla… E situacion cu tin Havenstraat ta un caya cu lo no worde cera. Segun Sr. Kramers no lo bay tin ningun contratiempo y den e simannan planea e trabaonan lo keda cla y trafico lo bay ta sigui normal manera e tabata. E situacion cu tin den centro di Oranjestad ta, cu e cayanan cu tin actualmente habri, esey ta e situacion cu ta bay keda. Havenstraat ta bay ta gewoon cera temporal pa haci e trabaonan pa loke ta e railnan di tram.
Tin un area patras di bestuurskantoor unda te hasta a worde cera. A puntra Polis si por habri e esaki back pa e dianan nos dilanti? Polis a pidi DOW pa cambia cierto parti so… Richard Kramers encarga cu planologie a splica mas di e trabaonan. Segun Sr. Kramers ta bisa, cu si pa un temporada hopi grandi no ta bay tin nada, e opcion lo t’ey pa habri e caminda tras di bestuurskantoor.
Pero si pone algo den e simannan cu ta bin, no ta recomendabel pa habri e caminda dos of tres dia y despues ta cera atrobe y trece mas confusion. Unico cos ta, a pidi DOW pa habri pa cambia e parti di Oranjestraat, caminda cu e trafico ta bay enbes di Sali for di Censo, door cu tin un spot cu bo no ta mira e trafico cu ta bin di man robes, pa cambi’e haci e salida un entrada y entrada salida. Ta wardando e personal di DOW haci un ahuste na e acera y asina cu esaki worde drecha, lo haci e cambionan necesario.
A haya goedkeuring caba, caminda cu DOW ta di acuerdo pa haci e cambio. Ta djis warda pa haci e trabaonan tuma luga y e caminda worde habri, Sr. Kramers a bisa finalmente.
