“Awe esnan cu a bisa cu no ta kere den dje por wak cu esaki ta un proyecto serio di Gobierno”
Minister Sevinger na instalacion di rails
ORANJESTAD (AAN): A yega na otro punto importante di e proyecto di renobacion di nos centro di ciudad.
Minister di Integracion, Infrastructura y Medio Ambiente, Benny Sevinger hunto cu Prome Minister Mike Eman a pasa personalmente pa mira con e instalacion di e rails den caya principal a cuminsa. “Pa hopi un proyecto cu a wak’e como los di e totalidad di caya grandi. Semper nos a bisa cu e proyecto di trolley, streetcar…con nan kier a yame, ta esaki ta e curason di e proyecto,” Minister Sevinger a bisa.
Estudionan haci dor di Gabinete Mike Eman, a determina cu un turista ta cana te un tercera parti di caya grandi. Esey ta nifica cu hopi di e tiendanan den otro dos tercer parti di caya principal ta muda pa centronan comercial y otro luganan.
Minister Sevinger a bisa cu ta pesey a dicidi den diferente reunion cu experto local y internacional cu esaki ta e metodo pa transporta hende for di punta di waf te final di Caya, un trayecto cu ta dos kilometer largo. “Awe esnan cu a bisa cu no ta kere den dje por wak cu en berdad esaki ta un proyecto serio di Gobierno.
En todo caso ta duna e oportunidad na e tiendanan di por sobrevivi y competi den e area y riba nos isla,” Minister di Infrastructura a indica.
E implementacion di un sistema di streetcar ta djis parti di e Plan ‘BoAruba’ cu ta conecta cu Centro Historico, cu edificio di Corte cu ta den renobacion, cu Watertoren y henter e area di lagoen, Misa, Madiki, etc.
Plan renobacion di centro di Oranjestad ta forma parti di e plan macro ‘Bo Aruba’ crea, dirigi y ehecuta pa Gabinete Mike Eman cu sosten di diferente departamento publico. “Esaki ta un proyecto cu ta keda dinamico y ora cu Gobierno cambia of yega na otro constelacion, e proyecto aki ta sigui.
No ta un proyecto cu ta caba December y nos a lubida riba dje. Constantemente ta bay tin transformacion, lo sigui cu otro cayanan,” Minister Sevinger a conclui.
Edgar Tromp
No lubida si cu mester di mantecion necesario continuamente. no djies pone e trolly riba rails i corre bai i bin.
i ta di spera cu lo por saca e gastonan cu a iverti cu placa di belasting di pueblo back.
saludos.