“E simposio ta un paso importante den e proceso di reflexion profundo riba nificacion di Reino”
Rector di Universidad di Aruba dr. Glenn Thode
ORANJESTAD (AAN): E prome simposio di Reino cu tabatin come tema “Relacionnan den Reino y e balor adicional di Reino Hulandes” a worde teni riba iniciativa di Prome Minister Eman y organiza door di gobierno di Aruba hunto cu Universidad di Aruba. Rector di Universidad dr. Glenn Thode, kende cu un discurso cortico a habri e simposio bisando e audiencia “Boso ta na Aruba awor aki y na mes momento boso ta den Reino Hulandes”.
Pa continua cu su discurso bisando cu pa mas o menos dos siglo caba Reino Hulandes tin e postura di un Reinado. Esaki a worde adapta door di relacionnan cu a cambia den e parti Europeo di Reino (Hulanda) y den e partinan cu door di politica colonialista tabata worde mira sea como propiedad of parti di Reino. Manera por ehempel Indonesia.
Thode, “Reino Hulandes a sigui desaroya y a haya su postura actual ora Su Mahestad Reina Juliana riba 15 di december 1954 den Ridderzaal na Den Haag a decreta den forma solemne e Statuut pa Reino Hulandes”. Rector Thode a splica cu Reino Hulandes di awe ta manifesta su mes den forma automatico via Hulanda, pero ta tuma decisionnan tambe via Aruba y e otro cinco islanan. “E pregunta e ora ta. Con consciente nos ta di esaki?”.
Dr. Glenn Thode a bisa cu como rector di Universidad di Aruba e ta masha satisfecho cu ‘su’ Universidad hunto cu Aruba a organiza e simposio aki. “Un simposio cu por worde considera como un paso importante den un proceso di reflexion profundo riba nificacion di Reino Hulandes. Ora nos papia riba e balor adicional di Reino, nos por haci nos mes e pregunta ‘pakico’. Pakico Reino te existi? Pakico nos como comunidadnan ta parti di dje? Pakico abo y ami como Hulandesnan mester duna importancia na Reino Hulandes? Abo y ami ta sinti cu esaki ta un Reino pa nos tur cu ta Hulandes?” “Los di tur desaroyo historico ta importante pa nos haci nos mes tur dia e pregunta ‘cua nificacion ami ta duna awe na Reino y cua importancia ami ta duna e nificacion ey’? Cua ta e perspectivanan cu existencia di Reino ta ofrece abo, ami, mi suegro na Hulanda, mi wela na Boneiro? Kico e perspectivanan aki lo ta si Reino no tabatey? Con ami ta brasa, fortalece y uza e perspectivanan aki pa ofrece mi rumannan Hulandes y mi mes un miho bida?”
Despues di e serie di preguntanan aki Thode a bisa cu e simposio ta conta cu tremendo oradornan cu ta bay duna nan vision riba e balor adicional di Reino. Nan ta bay yuda cu e reflexion profundo.
E simposio a conta en berdad cu oradornan di renombre y cada un a trece nan vision padilanti den nan discursonan di peso. Cu Reino ta importante a bin mas biaha na ordo durante dia, mescos cu e cooperacion den Reino cu ta di vital importancia pa tur hende por tin mayor beneficio di Reino Hulandes.
