Home General “Un bon guia pa studiantenan ta un reto grandi”

“Un bon guia pa studiantenan ta un reto grandi”

1
0
SHARE
- Advertisement -

Minister Dowers na Hulanda:

ORANJETSAD (AAN): Minister Dowers durante di su bishita di trabao na Hulanda a bisa cu e ‘acogida’ y ‘guia’ di e studiantenan Arubianonan residencia na Hulanda ta un reto grandi pa departamento di Enseñansa. “Hulanda ta un pais cu hopi reglanan complica, cu sigur no ta facil pa compronde. Esey ta trece cune mas dificultad pa e studiantenan. Pesey aña pasa hopi studiante a haya nan confronta cu problemanan serio relaciona cu e.o. seguro.

Departamento di Enseñansa na Oranjestad conhunto cu Cas di Aruba a traha duro pa por soluciona e problemanan. Nos a siña hopi di e situacion aki y pesey nos a intensifica e informacion.” e mandatario a bisa.


   “Den e ultimo 2 aña y mey, hopi a worde mehora, pero ainda nos no ta satisfecho. E servicio na studiantenan por y mester ta mihor. Preguntanan cu nan ta trece dilanti mester por worde contesta rapidamente. Un cos si ta sigur: nos no por soluciona tur nan problemanan. Hulanda ta introduci reglanan y nos no tin ningun influencia riba e implementacion di esakinan.

Esaki no ta kita cu e ta trece situacionnan di hopi incomodidad pa hopi studiante. Pesey ta importante pa nos keda den contacto cu tur nos studiantenan. Departamento di Enseñansa di Cas di Aruba bou guia di sr. Samuël Dumfries a logra hopi caba.”

   Un otro problema grandi ta cu aproximadamente 1 di cada 3 studiante Arubiano ta cambia di estudio den nan prome aña escolar. “Un estudio den exterior ta hopi costoso caba, si bo dicidi di cambia di estudio esaki ta trece mas gasto financiero cunele. Pesey nos maneho ta pa yuda studiantenan tuma un decision eficazmente.

Awendia internet ta un recurso hopi informativo y eficiente pa realisa un bon escohencia”

   Tampoco e introduccion di e ‘langstudeerboete’ no lo haci studia na Hulanda mas simpel pa ningun studiante. Esaki ta encera cu esun cu tin un tardansa di mas cu un aña mester paga un multa di 3000 euro, aparte di su ‘collegegeld’. “Esaki ta un medida Hulandes y nos mester acepta esaki. Locual si ta molestiami ta cu el’a worde introdusi cu forsa retroactivo, pues bayendo back te cu 1991. Cu otro palabra e reglanan ta worde cambia durante e procedura. Asina studiantenan ta worde confronta cu un decision cu a worde tuma pa nan, mientras cu nan no por haci nada mas pa cambi’e. Cas di Aruba ta inventarisando e cantidad di studiante cu lo por haya nan confronta cu e efectonan di e medida nobo aki. Asina cu nos tin un bon imagen di esaki, nos mester evalua di ki manera nos lo yuda nos studiantenan. Dia 25 di juli corte na Den Haag lo duna su veredicto den e caso di ‘langstudeerboete’. Mi ta spera cu esaki termina positivamente pa e studiantenan.” Minister Dowers a bisa.

   “Un medida asina ta haci cu un estudio na Hulanda cada dia ta bira mas costoso. Pesey nos mester amplia nos maneho y opta pa inverti mas den e posibilidadnan pa continua un estudio na Aruba. Nos no lo logra pa ofrece tur estudio na Aruba, pero pesey nos lo mester investiga tur e posibilidadnan cu nos region tin pa ofrece. Si encaso esaki ta financieramente mas beneficioso, siguramente nos mester stimula esaki.”

   Pa motibo cu Minister Dowers su bishita di trabao tabata cortico, eno a logra reuni cu e studiantenan arubiano residencia na Hulanda. “Esaki mi lo haci den luna di juli, ora mi ta back na Hulanda pa un deliberacion cu mi colega señora van Bijsterveldt. Mi ta haya sumamente importante pa tuma e tempo y reuni cu studiantenan, pa asina tende di nan mes kico ta nan experiencianan aki na Hulanda. Mi ta aplaudi e ambicion di Cas di Aruba y colega Abath y su team pa intensifica e contacto cu studiantenan, unda e lema ‘service’ ta e unico cu ta conta.”

   Riba e potret di Nico van der Ven, por mira Minister di Enseñansa y Husticia sr. Arthur Dowers den combersacion cu hefe di departamento di Enseñansa di Cas di Aruba sr. Samuël Dumfries y funcionarionan di departamento di Enseñansa di Cas di Aruba señora Ivonne Navas y señora Magdalena Dirksz.

- Advertisement -

DUNA COMENTARIO

Please enter your comment!
Please enter your name here