Analisis politico
Por si!
ORANJESTAD (AAN): Ya DOW tin dos aña ta tortura nos hendenan cu ceramento di cayanan pa lunanan largo sin cu por mira pakico e trabaonan ta dura asina tanto tempo.
Nos a trece padilanti caba cu e drama di de La Sallestraat mester bira un buki cu lo sirbi como un ehempel con e ambtenaarnan si nan kier por causa gobierno y henter un pueblo un daño enorme. Tur atardi banda di tres or no tin un alma mas ta trahando ariba e construccion di e caya aki.
Diasabra y diadomingo no tin ningun movecion pa trata di acelera e trabao. Awo ta un paar di dia pasa nos a tende cu no ta e hefenan di DOW so ta dicidi ariba e manera di castiga nos comunidad tratando seriamente di causa problema pa e gobernantenan. Tin un comision cu mester dicidi ariba tur e proyectonan. Esaki e hefe di DOW a declara splicando cu e rampa cu mester worde traha banda di Surfside mester haya aprobacion di e comision aki prome cu por bay destaho publico y esaki ta bay tuma basta tempo. Manera cos a mustra ora a cera e pida beach dilanti di cas di Gobernador ta e ora ey DOW a ripara cu mester bin un rampa otro caminda.
Awo nos a haya poco speranza atrobe sin sa si ta e comision a cuminza realiza e disaster cu DOW ta creando of ta algo a lanta cerca e hefenan di DOW pero den un di su ultimo declaracionnan e hefe di DOW a anuncia cu DOW ta bay traha anochi pa causa menos molester pa e trafico di nos isla. Nos ta kere cu esaki kier meen cu DOW ta bay realizando cu por traha 24 ora pa dia y tambe ariba diasabra y diadomingo. Pero loke seriamente a duna nos un optimismo pa futuro ta e hecho cu DOW, nos ta kere cu ta DOW, a construi un tremendo rotonde den un anochi. E rotonde banda di Xerox no tabatey atardi y pa su mayan e tabata cla y den function. Tremendo! Por si! Por ta hasta nan a construi e rotonde aki sin cera e caya pa trafico durante e trabaonan.
Awo nos no sa si ta e comision a dicidi di para e hefenan di DOW di sigui fastidia nos ciudadanonan of ta e hefenan mes a realiza cu loke nan tabata haci ta inaceptabel of un combinacion di tur dos. Por ta tambe cu no ta e hefenan a percura pa e trabao aki worde haci asina lihe pero cu nan tabata di vakantie y otro a mustra cu por. Ta dificil pa huzga kico a pasa cu nos a haya un rotonde bon den algun ora.
Den historia di nos pais no tabatin un gobierno cu a haci asina tanto den asina corto tempo. Ariba tur tereno e gobernantenan ta activo introduciendo un cantidad di cosnan hopi positivo pa nos isla y pesey ta mas tristo ainda ora nos mira con tin departamentonan cu ta worde maneha door di campañadornan di MEP cu ta trata di tur manera di perhudica e gobernantenan aki. Ora AVP ta den gobierno y bin un vacatura special ora ta trata di hefenan e gobierno di AVP ta tene un procedura di solicita habri y e persona cu ta miho cualifica ta haya e trabao. MEP ta completamente otro.
No ta tene ningun procedura habri. Ta nombra e MEP mas fanatico cu ta buscando un trabao los di su capacidad y studio. Su calificacion mester ta un MEP ciego. Ora di haya e trabao su orden ta cu dia cu tin un otro gobierno cu no ta di MEP e mester percura pa boycotia e gobierno ey mas hopi posibel. E resultado di e tipo di maneho ey nos ta mira tur dia. Si tabatin un proyecto cu tabata totalmente corupto tabata e brug di Marisol. Henter e proceso di e brug aki tabata malo y tur hende por a mira esaki di leu. E mesun hefenan cu awe tin tur caminda na werki tabata di fiesta cu Marisol dia cu e brug a worde habri.
