Aruba ta mas adelanta cu Hulanda riba algun tereno
Embahador di Reino na NU Herman Schaper :
ORANJESTAD(AAN)– Un di e bishitanan cu Prome Minister mr. Mike Eman a realisa na New York tabata cerca Embahador di Reino na Nacionnan Uni Herman Schaper, kende den un entrevista a enfatisa cu e ta representa tur e partnernan di Reino Hulandes. Pero parti importante di e combersacion tabata relaciona cu e proximo biahe pa e Cumbre di Rio +20 caminda lo discuti temanan relaciona cu desaroyo duradero cual lo trece cune crecimento economico, bienestar mas grandi pero no a costo di medio ambiente, y cu tur hende por probecha di esaki.
Den futuro energia di solo y biento lo bay ta masha importante den e produccion.
Schaper a splica cu otro aspecto cu lo bay wordo discuti na Rio de Janeiro ta turismo, con esaki por crece pero combina cu proteccion di medio ambiente, cual ta temanan cu na Aruba tambe ta wordo discuti. Tur temanan cu ta wordo discuti na Rio, na opinion di Embahador Schaper ta di gran importancia pa Hulanda pero tambe pa Aruba ta hibando un maneho den e direccion aki. E hecho cu Prome Ministernan di Aruba, Sint Maarten y Corsou ta forma parti di e delegacion, na opinion di Embahador Schaper, ta reforsa e posicion di e delegacion na Rio, caminda ta bay atende e temanan for di diferente angulo. Na mesun momento ta ilustra cu no ta papia di solamente e pais rico Hulanda, pero e islanan tambe cu cada un tin nan mesun posicion . E experiencia di Aruba lo por ta un les pa otro paisnan, hasta Hulanda pasobra di e informacionnan cu el a ricibi ta mustra cu Aruba ta hopi mas adelanta cu Madre Patria riba e tema di energia di biento.
Durante e entrevista Embahador Schaper a mustra masha interes pero tambe elogio pa loke Aruba a bin ta haciendo. El a duna e ehempel cu un di e temanan cu lo bay wordo discuti na Rio de Janeiro ta e cooperacion cu mundo empresarial. “Pa soluciona problemanan, no solamente e mester bini di Gobierno, pero mester tin un bon cooperacion entre e dosnan aki y ta asunto cu hopi biaha ta wordo discuti tambe den Nacionnan Uni. Y den esaki tambe Aruba ta cana, riba algun tereno, dilanti. Hulanda ta traha duro riba e tereno aki pa cual algun empresario ta forma parti di e delegacion y ta spera di por organisa algun reunion y forum den cual Prome Minister di Aruba tambe lo por hunga un rol,” e Embahador a comenta.
Den Nacionnan Uni , Schaper ta defende interesnan di Hulanda y Reino Hulandes. Pero e organisacion mes ta trata temanan amplio cu ta regarda mundo completo. E meta ta pa yega na solucionnan comun pa e problemanan cu e paisnan tin cu otro.
