Asina rapport di desempleo ta conoci mi lo mande pa Parlamento, mescos cu mi a haci cu tur otronan
Minister Otmar Oduber na Señora Ruiz-Maduro
ORANJESTAD (AAN): Minister Otmar Oduber ta considera cu oposicion ta traha den un forma straño, particularmente Señora Ruiz-Maduro, kende e por a scucha ta papia di cifranan cu no ta worde presenta of cu ta worde scondi.
Akinan e mandatario a recorda con partido MEP den Gobierno a sconde 270 rapport di CAD cu tabata raporta corupcion, fraude y ladronicia cu tabata tuma lugar durante gobernacion di partido MEP pa 8 aña largo. Esey e minister ta considera sconde cifra y resultadonan.
Pa loke cifra di desempleo, Minister di Turismo, Transporte y Labor a informa cu Banco Central ta raporta continuamente kico e cifranan aki ta. Mirando e cifranan aki por bisa cu Gabinete Mike Eman a ricibi un pais cu tabatin un cifra di desempleo di casi 11%, mientras cu recientemente Oficina Central di Estadistica a publica e cifranan di desempleo haya for di ultimo censo cu a tuma lugar na 2010, cu ta menos cu un aña despues cu e Gobierno nobo a sinta. E cifranan aki ta un refleho tambe di loke Gobierno di e Parlamentario di MEP a bay laga atras na 2009. Pesey e mandatario no ta compronde con Señora Ruiz –Maduro por bisa cu no tin cifra publica.
Banda di esaki final di 2011 y cuminsamento di 2012, Minister Otmar Oduber despues di a mira cu tin diferente cifra disponibel cu no ta cuadra cu otro pa loke ta desempleo, a pidi, pa promer biaha den historia, pa haci un estudio pa mira kico e efecto di desempleo ta na Aruba.
“Mi no por duna Señora Ruiz Maduro loke mi mes no tin. E cifranan ta worde compila y ta den concepto. Otro siman por cierto mi tin un encuentro cu Departamento di Labor caminda cu nan ta bin discuti e resultadonan preliminario promer cu por hinke den un rapport. Un cos mi por sigura Señora Ruiz-Maduro: kico cu e resultado ta di e rapport aki, una bes cu e ta conoci cerca mi, mescos cu ma haci cu tur otro rapportnan, mi mes ta mande pa Parlamento sin cu e ta worde pidi pa por discuti riba nan, pasobra ta pesey mi a pidi e cifranan. Si nos kier a sconde cifranan nos no ta pidi pa rapport worde traha, mi lo usa cifranan di Banco Central cu ta mustra cu desmpleo a worde reduci”, Minister Otmar Oduber a duna di conoce.
E rapport aki a worde traha door di Departamento di Labor mes conhuntamente cu Oficina Central di Estadistica usando e mesun metodologia di e ultimo aki. A bishita 2 mil cas pa realiza e encuesta laboral aki caminda cu hasta mester bin dilanti den ki sectornan tin mas desempleo. A base di e resultado aki por crea un maneho pa loke ta trata labor na Aruba.
