Consumo di alcohol entre hubentud ta alarmante
Inspector Ricardo Muller:
y intencion ta pa hisa edad pa benta na 18 aña
ORANJESTAD (AAN): Ricardo Muller hefe di e departamento di trafico di cuerpo policial a comenta un tiki riba uso di alcohol entre e hubentud cu ta algo alarmante. No ta di awor cu ta buscando manera di haci cierto cambio. Tin algun ley cu kier introduci den leynan di trafico.
Hefe di polis Ricardo Muller a splica cu nan kier cambia e edad pa bende alcohol na menor na 18 aña. Ricardo Muller hefe di polis di trafico a splica cu ta prohibi pa bebe alcohol ora ta core auto. Si mester tuma sanger di hende envolvi den un accidente y e ta bebi anto aki tambe tin sancion.
Tin diferente cambionan. E ta na beneficio di e hoben mes e cambio di leynan aki. Awendia e salud di hoben mes ta bay atras pa mal uso di alcohol y ta causa peliger pa e otro hendenan riba caya segun Inspector di polis Ricardo Muller.
E control mester tey tambe cerca esnan den negoshi pa chek si e persona cu ta cumpra e alcohol tin edad exigi. E edad ta bay cambia pa 18 aña pa bo por tin alcohol den auto tambe. E inspector di polis a splica cu hopi biaha polis sa para muchanan menor di edad ta core auto.
Tin biaha mayornan mes ta coopera dunando yiunan yabi di auto sea pa bay school of trip cu e auto. E responsabilidad di e hobennan tambe mester tey segun polis.
