ORANJESTAD (AAN): Diasabra awor, e dama Deanna Pinilla ta saliendo pa Houston, Texas. E ta e actual T.E.E.N. World Aruba 2012. E lo representa e isla bao nomber di e cas di belleza A&A Production Home of Beauties den e certamen di Miss T.E.E.N. World 2013
Miss T.E.E.N. World ta worde organiza pa Gaspar Cruz cu tambe ta encarga cu otro certamennan entre otro Miss T.E.E.N. US, Jr. Teen US y Miss US Intercontinental. E aña aki e certamen di T.E.E.N. World ta cumpli su promer lustro. Ademas di ta organiza y dirigi e certamennan ya menciona Sr. Cruz ta un fashion designer, tin su propio linea di maquillaje y accesorio.
E aña aki ta oficialmente e di prome biaha cu Aruba lo ta mandando un candidata pa e certamen aki cual ta conta cu participacion di mas di 20 pais, E anochi final cu lo ta ariba 30 di juni. Ademas di e titulo máximo, lo saca tambe e cuatro finalistanan, premio pa Best National Costume, Best Swimwear, Best Gala Dress, Photogenic y Congeniality.
E ganadora máximo lo ricibi entre otro un beca escolar pa Barclay College, Fashion Photo Shoots, Productonan pa cabei, Cosmetics by Gaspar Cruz, linja di zapato y di panja, oportunidad pa biaha y representa e organizashon además di otro premionan. Ganadoranan cu a bay cu e titulo di T.E.E.N. World den pasado ta Inglatera (2009), South Africa (2010), Grecia (2011) y Brasil (2012).
Deanna tin tur e potential pa representa Aruba. Deanna no ta un mucha desconoci ya cu el a yega di participa den varios Playback Shows, Miss Teen International Aruba 2010 y a bay cu e premio máximo di Beauty of the World 2010 cual certamen a ser teni na Republica Dominicana. E ta studiando na Universidad di Aruba den e facultad di Hotel, Turismo y Maneho.
E ta forma parti di e programa masha gusta pa grandi y chikito, Conoce Nos Talentonan y ta modela pa Knock Out Model Agency. Ademas di baila y modela, e ta gusta biaha pa conoce lugarnan nobo. Su meta ta pa caba cu su estudio na Universidad di Aruba pa después bay Merca pa sigui studia pa su Master’s Degree.
