Den algun siman Hof lo conseha Gobierno riba un PG nobo
ORANJESTAD(AAN): Despues cu Procurador General Robert Pietersz aña pasa a baha cu pensioen, no a logra yena e vacatura aki ainda. Si tin un proceso andando, segun gobierno a splica den un declaracion. Pa cuminsa a bisa cu pronto Aruba lo tin un otro Advokaat General, cu sigur lo reforsa Ministerio Publico.
Di otro banda Hof a combersa cu algun persona cu a mustra interes pa ocupa e funcion. E proceso no ta cla ainda. Na final nan lo duna gobierno un sugerencia di e candidato cu nan ta kere cu ta mas apto pa e cargo importante aki. Gobierno mes ta calcula cu e conseho aki ta drenta den algun siman di tempo.
Gobierno a bisa cu ta necesario pa tin un persona na cabes di Ministerio Publico. Aunke mester bisa cu ultimo añanan e organizacion aki a worde reforsa cu basta funcionario door di e hopi trabaonan. Tambe nan a haya hurista cu a haci cu e peso ta miho reparti cual lo haci e trabao di PG menos pisa den sentido cu e por encarga cu e maneho enbes di ehecuta cierto tareanan.
Pa loke ta e falta di personal cu ta papia di dje den Corte cu ta causa un retraso grandi den tratamento di e casonan, gobierno a desmenti esaki. A haci un analisis di cifranan di Aruba compara cu tur e paisnan den Reino, y e resultado tabata cu no tin un retraso grandi. Tin cierto casonan cu mester por bay mas lihe.
Pero recientemente a huramenta un Hues nobo cu a yega, cu lo bay traha specificamente cu e casonan retrasa. Hof lo sigui monitor e situacion y lo informa e mandatario di e situacion. Pero no tin un retraso exagera, solamente cu tin cierto casonan cu ta dura hopi largo pa nan worde trata. E retraso cu a crece pero cu ta traha riba dje pa baha esaki, usando mas Hues pa traha sentencianan.
Aruba tambe ta contribui cu e aspecto financiero di Corte y e ultimo suma presupuesta tabata 14 miyon Florin.
