Dianan 19 pa 22 di juni WEB Aruba ta anfitrion di conferencia di awa di CARIBDA
Cu alrededor di 200 participante for di region di Caribe
ORANJESTAD (AAN): WEB Aruba NV ta cla pa ricibi 200 participante di e conferencia y expo di Caribbean Desalination Association (CARIBDA), cual lo tuma lugar di 19 pa 22 di juni proximo na The Westin Resort.
E conferencia ta un plataforma caminda companianan y fabricantenan di plantanan di awa ta comparti experiencia y conocemento di recurso y tecnicanan di desalinacion y di re-uso di awa.
Tema di e conferencia y e exposicion ta “80 Years of Desalination Makes For One Happy Island”. CARIBDA a scohe e tema aki pa pone atencion na e di 80 aña di existencia di Aruba su planta di produccion di awa.
Simplemente bisa, desalinacion ta nifica saca salo for di awa di laman y trata esaki di manera cu e ta bira awa di bebe. ‘Cu nos experiencia amplio riba tereno di desalinacion, nos ta contento di por contribui na CARIBDA, pa hisa calidad di awa y nivel di tecnica di desalinacion di awa den region di Caribe’, asina Asja Dongen, relacionista publico di WEB ta informa.
E sesion di apertura oficial ta tuma lugar dia 20 di juni den presencia di Gobernador Refunjol. Minister di Utilidad, señor Mike de Meza lo duna un palabra di bonbini na tur participante. Durante e conferencia señor Filomeno Boey Marchena, experto di desalinacion di awa na WEB, lo duna un presentacion di desaroyo di WEB su tecnica di desalinacion di awa, for di dia cu a inicia e planta di awa na 22 di juni 1932 te awor.
Veolia Water Solutions & Tecnologies, cu ta e compania cu a construi e planta nobo di SWRO II na WEB, tambe lo duna un presentacion tocante desalinacion na Aruba, di awor pa futuro.
Banda di e presentacionnan aki lo tin diferente presentacion cu lo ilustra varios tecnica y reto cu companianan di awa den region di Caribe ta haya nan mes confronta cu ne durante e proceso di desalinacion.
Algun reto ta e dependencia di combustibel caro y eficiencia den produccion di awa.
Banda di e conferencia lo tin un exposicion caminda diferente compania miembro di CARIBDA, entre otro WEB, lo tin un stand cu informacion di nan producto y proceso di produccion.
Ta mantene un tarifa special di entrada pa esnan cu ta desea di bishita solamente e exposicion. ‘WEB ta contento di por participa cu lo habri porta di e exposicion pa publico, sin cobra entrada, riba diahuebs 21 di juni entre 3:30 y 5:00 or di atardi.’, asina Dongen a conclui.
