Director di dr. HOH dr. Jaime Falconi ta haci presentacion di plannan pa e futuro hospital
Cambionan grandi porfin ta bay worde efectua na Hospital
ORANJESTAD(AAN): Den oranan di mainta director medico di dr. Horacio Oduber Hospital dr. Jaime Falconi a haci un excelente presentacion pa personal di hospital riba e plannan di su renobacion, di e edificio nobo y di e masterplan. Plannan ambicioso cu ta pas den e tempo di awe na unda mundo den forma rapido ta cambiando y cu e cambio continuo aki e exigencia pa miho calidad di cuido.
E sala tabata completamente yen cu empleadonan masha interesa pa sa con nan hospital ta bay keda aki 4 aña despues cu e fase di renobacion y construccion nobo keda cla. E presentacion tabata cla y comprendibel.
E construccion nobo ta e prome parti cu ta cuminsa cu ne na luna di october caba ya tur cos ta canando segun schema. Ora e parti aki ta cla ta sigui cu renobacion di e hospital existente. E masterplan ta encera cambionan mucho mas grandi ainda. E parti aki ta keda cla na aña 2037. A tene cuenta cu tur aspecto medico ora a traha riba e plannan pa e hospital di futuro. “E hende ta para central”, asina dr. Falconi a accentua na mas di un ocasion. Buro di arkitecto Bermello, Ajamil y partnernan a tene cuenta cu e deseonan di e personal di dr. HOH na momento cu a diseña e plannan. E dos proyectonan di renobacion y construccion ta costa en total 100 miyon Dollar. E placa aki ta worde paga door di SOGA cu despues ta lease edificio cu gobierno cu na su turno ta laga dun’e den uzo na hospital.
Prome Minister Eman tambe tabata presente na e presentacion aki, mescos cu algun miembro di SOGA y di Infrateam di Ministerio di Infrastructura y miembronan di e organizacion di derecho di pashent.
Na final tabatin un seccion di pregunta. E sala cu tabata completamente yen cu mas o menos 60 hende a haci bon uzo di e oportunidad aki pa haci pregunta y tambe pa haya mas informacion riba nan preocupacionnan. Durante henter dia tin sesionnan habri na unda e personal por cana drenta pa tira un bista riba e pinturanan na muraya y e dos maquettenan cu tin den e sala. Un otro presentacion door di dr. Falconi a worde prepara pa tres or di atardi dunando asina mas tanto oportunidad pa e personal cu ta subi warda atardi tambe haya e informacion corecto. Ora cu e proyectonan keda conclui Aruba ta bay tin un hospital moderno cu tur facilidad medico cu un hospital mester pa por brinda e bon cuido di calidad y cu ta crea un ambiente positivo pa e empleado traha aden.
Dr. Horacio E. Oduber Hospital a worde construi na 1976 cu un cantidad di 320 cama. Despues di 36 aña e tempo a yega pa haci tur e cambionan y adaptacionnan necesario cu un hospital moderno ta rekeri.
