Dr. Jose Mario Sprok ta ricibi su titulo den Master den Gerencia di Salud na Costa Rica
Un logro mas di un Arubiano destaca den exterior:
ORANJESTAD (AAN) – Ki orguyo pa famia Sprock, pueblo di Aruba, y pa Costa Rica sigur, cu nos specialista y ciruhano Cardiovascular dr. Jose Mario Sprok ta gradua awe, diabierna 22 di Juni 2012, ricibiendo su titulo di Master den Gerencia di Salud, den e prestigioso ICAP (Instituto Centroamericano de Administracion Publica).
Hunto cu su colega Angela Lara Escalante, dr. Jose Mario Sprok a presenta cu exito su tesis “Estilos de liderazgo prevalescientes en el proceso quirurgico del Hospital San Juan de Dios”.
Jose Mario a haya e honor di pronuncia e discurso di apertura y den un entrevista cortico cu DIARIO, el a mustra sumamente complaci y orguyoso di esaki.
E programa ta cuminza cu ingreso di e graduadonan, Himno Nacional di Costa Rica, Palabranan di dr. Jose Mario Sprok como representante di e graduacionan den e areanan di Gerencia di Proyecto y Area di Gerencia Social, sigui pa e Coordinador di e Area di Gerencia Social Ing. Alan Henderson Garcia, MAE; MSc. Ramon Rosales Posas, Coordinador di Area di Gerencia di Proyectonan di Desaroyo; Viceminister di Administrativo di Ministerio di Husticia y Paz Lic. Jorge Rodriguez Bogle; Viceminister di Saslud. Dra. Sisy Castillo Ramirez; Viceminister di Planificacion Nacional y Politica Economico, MSc. Silvia Hernandez Sanchez. Despues lo sigui cu entregamento di e titulonan y finalmente sra. MSc. Rethelny Figueroa de Jain, Coordinador Tecnico y Director di ICAP, lo hiba e discurso di conclusion, sigui pa un brindis. E evento aki lo tuma lugar den e Salonnan Zurqui 1,2 y 3 di Radisson Europa & Conference Center pa 9’ or di mainta.
Jose Mario lo ta acompaña pa su esposa, sobrino/yiu muher, y su mayornan sr. Nelson y sra. Lucia Sprok- Tromp.
DIARIO ta manda hopi pabien na Jose Mario, su mayornan, y henter su famia y ta desee hopi exito den su trayectoria profesional. Nos ta gradici’e pa e primicia aki, y cu el a confia nos su discurso di apertura cu nos lo traduci den un articulo apart!
Tambe nos a ricibi copia di su tesis, pero ta dificil pa haci resumie den corto tempo. Nos lo dedica tempo na dje sigur, y den e dianan venidero nos lo comparti un resumen cu nos lectornan.
