E hubentud tabata goza berdad inmensamente pero nan tabata bao influencia di alcohol perdiendo tur clase di berguensa
Hefe di Polis Naldi Tromp:
ORANJESTAD (AAN): Naldi Tromp hefe di polis pa e distrito 1 a hiba palabra durante e conferencia di prensa cu a worde yama relaciona cu actividadnan den fin di siman. E tabata encarga cu e seguridad di e conciertonan cu tabata tin. Tabata tin un maneho hiba pa polis durante e concierto.
Segun Naldi Tromp e prome dos dianan di concierto a bay hopi bon.
E di tres dia cu e DJ Chukkie si tabata tin un grupo di bishitante diferente y esaki a cuminsa bira un problema a base di e comportacion di esnan presente. Te hasta a pidi organizadornan pa caba e concierto aki mas trempan.
Tabata tin como dos dama cu a bay for di tino pa motibo di alcohol y peleanan caminda cu seguridad priva mester a actua. E situacion por a bay for di man. E multitud a bay den un trans cu e musica y cu kelkinan grandi yena cu alcohol. Tabata tin hobennan cu a kita lomba sunu. El a caba 2or y 30 y despues e situacion a calma.
E hubentud tabata goza berdad inmensamente pero nan tabata bao influencia di alcohol perdiendo tur clase di berguensa segun e hefe di polis. Den situacionnan asina semper e grupo aki ta kere cu nan tin razon pero hopi biaha no tin razon.
Naldi Tromp hefe di polis a splica cu e lugar unda e actividad y concierto a tuma lugar tabata hopi bon pa nan. Nan por a handle e seguridad necesario. E seguridad priva a actua na diferente occasion. Naldi Tromp a splica si cu ta un excepcion a haci pa e area di waf pasobra leynan internacional no ta permiti esaki sin mas den futuro.
