Parlamentario Clarisca Velasquez
ORANJESTAD (AAN): Segun Clarisca Velasquez di AVP, nan a tuma nota cu e fraccion di Mep den parlamento no ta haciendo nan trabao den parlamento. Tur leynan cu ta drenta parlamento Mep no ta haci ni un pregunta na gobierno pero si nan kier bay piki pieuw na tur e construccion cu ta tumando lugar rond di nos isla.
Nan ta desespera pa poder cu nan no sa kico mas pa haci pero nan trabao mes nan no ta haci den parlamento.
Bo contribucion cu bo por duna como parlamentario ta haci pregunta riba tur e leynan cu ta drenta parlamento na gobierno y haci e cambionan cu abo ta pensa cu mester haci cambio y asina bo ta duna bo contribucion na e leynan aki.
Nos a ripara si cu for di dia cu e kiebro a bin den Mep na januari 2011 e fraccion di Mep no ta haci uso di nan funcion como parlamentario pa haci pregunta riba e leynan cu ta drenta parlamento y esaki ta debi cu sra Mervin Wyatt Ras tabata esun cu tabata traha tur e preguntanan e tempo aya pa e fraccion di Mep den parlamento.
Y for di e dia ey e fraccion di Mep no ta haci ningun pregunta mas riba e leynan y nan ta sconde tras di e derecho cu tin pa haci pregunta durante reunion publico!
Pero bo ta nota e diferencia aki grandemente den e fraccion di Mep den parlamento paso awe Mervin Wyatt Ras no tey mas y niun pregunta no ta worde haci mas pa ningun ley cu ta bin parlamento. Contribucion di e preguntanan riba leynan ta bin solamente di e fraccion di AVP, PDR Y Independiente Mervin y Marisol so.
Y esaki ta di lamenta pasobra nan no ta duna ningun contribucion na leynan cu ta bin parlamento.
Bo contribucion como parlamentario lo ta hopi mas efectivo si bo ta haci bo preguntanan riba leynan cu ta drenta parlamento y si bo ta pensa cu mester bin cambio den e leynan bo ta traha bo amiendanan pero asina manera Mep ta haci nan no ta duna ningun contribucion positivo na pueblo di Aruba y solamente ta cana piki pieuw na tur e bon desaroyonan y construccion cu tin andando rond di nos isla!
E madurez cu Mep mester mustra den parlamento ta asumi responsabilidad y duna nan contribucion na leynan cu ta bin parlamento door di haci preguntanan y bin cu amiendanan si nan kier cambio den e leynan aki.
