Diario Online

EPB ta haci distincion cu alumnonan cu caba School

Publication: Saturday, 23 June 2012. Categoria: General

Diferente mayor y alumno disgusta:

 y cu a bin di enseñanza special basico

 ORANJESTAD (AAN) – DIARIO a tuma nota di cierto disgusto cu for di diamars cu a pasa algun mayor cu tin yiu na EPB, ta vociferando.

Pa varios aña caba ta tende di mayornan cu tin yiu na EPB-Aspirant, cu ora nan caba school esnan cu tin bon puntonan por sigui e nivel 3. Esnan cu no logra e puntonan halto ta caba, ta haya certificado y tin cu busca trabao cu loke nan tin, siendo cu nan no ta prepara ainda pa un trabao drechi. E muchanan aki ta precies esnan cu a bin for di schoolnan basico special, cu no ta haya den EPB nan merecido balor.

Mayornan y algun alumno mes a comenta na nos redaccion cu diamars cu a pasa, esta dos dia prome cu tin graduacion, tanto mayor como alumno a wordo avisa pa e cabesante cu diabierna 22 awor, pa 11’ or di mainta, tin un lugar pa nan bay come, cu e mucha no ta paga nada pero e mayor ta paga kico nan ta consumi.

Mayor y muchanan ta haya cu nan mester tin mesun derecho di tin un ceremonia di graduacion, mescos cu e otronan cu por bay direct pa Colegio EPI, of cu por bay traha cu mehor oportunidad cu nan.

Nan si ta gradua na Renaissance cu tur honor, pero e muchanan cu a bin for di schoolnan basico special no. Pero manera un limosna, e cabesante a dicidi diamars cu diabierna nan por haya algo, y hopi mayor no por a bay pasobra no ta asina sin mas nan ta bay pidi un par di ora liber na trabao pa sinta come cu nan yiunan. Esey a haci tambe cu varios alumno a bisa no, nan tampoco ta bay.

Nan ta haya cu con cu bay bin, con chikito nan certificado por ta, un school nan a caba y nan a bay tres aña largo y mester duna nan e balor cu nan merece. Ta un lastima cu tin e tipo di discriminacion aki. Un mayor ta corda cu algun aña atras tabata tin un meneer di Economia na Colegio Arubano, cu su prome base tabata den un school basico special na Hulanda. Ta ken por bisa cu un mucha cu ta bay EPB cu ta bin di un school special no por bay dilanti den futuro? No ta husto cu e muchanan aki nan mes ta sinti manera nan no tin balor, y e mucha mes a yega di reclama na school, pero nada a cambia y e aña aki nan a bin cu algo djis manera pa contenta nan un tiki, pero e muchanan aki y nan mayornan no ta bobo!

E muchanan aki a pasa den un opleiding di tres aña y nan a core stage, pero nan ta wordo hinca den un hoeki. Tin mayor cu a expresa cu EPB ta tumando hopi poder negativo y e ta puntra su mes kico ta bay sosode awor cu Leerplicht ta drenta na vigor e siguiente aña escolar, si e school tin asina tanto poder?

Otro mayor a subraya cu e docentenan ta sconde tras di e cabesante, pero nan mes no ta duna e alumnonan nan balor. E ta kere cu minister di enseñanza mester cuminza bin cu un opleiding pa docentenan di schoolnan secundario manera EPB, pa nan siña anda y balora e muchanan cu ta bin di enseñanza special, duna nan e apoyo cu nan mester y no hinca nan den un hoeki pero percura pa nan bay mas dilanti posible, y na final di school duna nan e reconocimento mereci pa loke nan a logra, con chikito cu nan por mire, pero cu ta keda un certificado di tres aña di estudio y esfuerzo, nan tambe merece di un ceremonia di graduacion.

Hasta den KIA, un mayor a subraya, tin un fiestecita pa esnan cu ta sigui cursonan di Enseñanza pa Empleo ora nan ta haya certificado.

El a remarca tambe cu hopi biaha e hobennan cu ta bay riba mal caminda ta pasobra nan no a haya un chens, y e ta sinti cu si school mes ta discrimina muchanan cu a bin di un nivel special di school basico, con den comunidad nan ta bay haya un trabao drechi anto?