FADA ta sigui concientiza comunidad specialmente mayornan riba e droganan nobo cu ta circulando
ORANJESTAD (AAN): Debi na e cantidad di reaccion cu a ser haya door di mayornan y diferente otro persona, F.A.D.A., Fundacion Anti Droga Aruba, kier sigui concientiza e comunidad di Aruba y muy specialmente e mayornan tocante di droganan nobo cu ta circulando.
E informacion aki nan kier a trece pa alerta y conscientisa di e peliger cu muy specialmente nos hobennan ta enfrentando awendia.
Siguientemente ta presenta un lista di nomber droganan nobo y cada dia lo amplia/ informa riba cada un di e droganan nobo aki.
E droganan nobo ta yama:
- OXI
- DIFERENTE PILDER
- MEPHEDRONE
- COCODRILO
- ROSEA DI DIABLO (DEVIL’S BREATH)
OXI
OXI ta un droga deriva di e pasta di cocaina y ta parecido na e base of crack.
E ta un droga cu ta worde uza den un fase avansa.
Algun ingredientenan:
Likido di laba paña
Kimico cu ta ser uza den construccion
Color: Maron
Procedencia: Brazil
Resultado di investigacion:
E Oxi ta 2 biaha mas fuerte cu crack, cu ta ser uza door di adicto ambulante, y hopi mas peligroso pa e salud. E droga aki ta hopi mas adictivo y por mata un persona den termino di aproximadamente 1 aña.
Algun Efectonan:
Duracion di e efecto ta di 3 pa 5 minuut so
Destruccion di organonan
Daño celebral critico
Ta bay af y saca pareu
Artefacto cu ta ser uza pa consumi e droga ta e pipa mescos cu e crack of base.
Na Brazil e departamento di salud a declara estado di emergencia mirando con e consumo di e droga aki ta creciendo.
E ta un droga barata pa esunnan di menos recurso pero awor e ta un droga uza door di tur clase social.
DIFERENTE PILDORA
F.A.D.A. kier a duna un breve alertamento tambe na e mayornan di e uzo di diferente pilder bou di hobennan cu ta ser uza pa droga nan mes.
Ta conseha mayornan pa warda pildernan di tur tipo na un luga sigur leu di e alcance di e yiunan pa motibo cu esakinan por worde uza como un medio pa droga curpa.
Na Merca tin e “ Pharma parties” caminda diferente pildernan, cu normalmente ta worde receta door di mediconan pa diferente malestar, ta worde uza den fiestanan door di hobennan combina cu alcohol pa asina droga nan mes.
E pildernan di tur tipo ta worde poni den un macutu y durante e fiesta, hobennan ta hinca man den e macutu y ta saca un cantidad di pildonan y ta bebe nan combina cu alcohol.
Esaki ta e forma di droga preferi na Merca, despues sigui pa marihuana.
F.A.D.A. ta kere den e hecho cu prevencion ta cuminsa na cas.
Pa esey F.A.D.A. kier a comparti e informacionnan necesario na e mayornan y na comunidad en general pa asina hunto nos por conscientisa nos hobennan ariba e peligernan y desgracianan cu uzo di droga ta trece cu ne y pa hunto nos por contribui na e bienestar y felicidad di nos comunidad.
Pa mas informacion por tuma contacto cu FADA na telefon: 5832999 of 5839610. Tambe por comunica via fax nr: 5834501, via fundacionantdroga.org of via Facebook. FADA ta situa na Campanastraat 5, Dakota (Tarabana).
Riba un otro articulo lo duna mas informacion relaciona cu e otro droganan. Keda pendiente!.
