Home Cultura Fundacion Lanta Papiamento a celebra su di tres aniversario otorgando

Fundacion Lanta Papiamento a celebra su di tres aniversario otorgando

3
0
SHARE
- Advertisement -

Premio Chuchubi

ORANJESTAD (AAN): Recientemente Fundacion Lanta Papiamento (FLP) a cumpli su di tres aniversario. FLP a celebra esaki cu un actividad festivo den Sala Madonna na Instituto Pedagogico Arubano.

   Un programa varia y hopi interesante a percura pa tur e personanan presente por a gosa di un anochi di Papiamento.

   Drs. Joyce Pereira, presidente di Fundacion Lanta Papiamento, a habri e anochi aki cu un palabra di bonbini na tur presente. Despues di e apertura a brinda cu champaña pa e ocasion special aki. Joyce Pereira a enfatisa cu FLP lo sigui duna informacion y lo sigui conscientisa nos pueblo encuanto e balor di idioma Papiamento pa su desaroyo.

FLP ta boga pa cambio di acercamento, posicion y maneho relaciona cu Papiamento y pa mehoracion y desaroyo di e status di idioma Papiamento, tanto localmente como internacionalmente. Desaroyo di un bon maneho y planificacion di idioma ta na bienestar di tur sector den comunidad, di gobierno y, en especial, di enseñansa.

   Selvia Lumenier, miembro di e fundacion, a declama tres poema cu e mes a skirbi dedica na nos idioma, cu a pone lana di e invitadonan reis.

   Ramon Todd Dandaré Mag. Ling., un di e pilarnan den e lucha pa reconocemento di Papiamento y cu un conocemento amplio cu e ta comparti tur dia cu su coleganan y studiantenan, a presenta un charla di kita sombre tocante vocabulario di Papiamento. Publico a reaccion entusiasma cu hopi pregunta y comentario.

  Fundacion Lanta Papiamento a introduci e anochi aki Premio Chuchubi  pa homenahea esnan cu a aporta na desaroyo di Papiamento.

   Sr. Etley Lasten, miembro di e fundacion, a presenta e relacion simbolico entre nos chuchubi y nos idioma Papiamento:

   Chuchubi ta un parha desprecia pa e propio hendenan cu ta scucha su canto, mescos por bisa tambe di Papiamento cu ta desprecia pa su propio papiadonan. Chuchubi ta e parha mas frecuente den naturalesa di Aruba, mescos Papiamento ta e lenga mas papia den comunidad di Aruba. Chuchubi ta un parha bringado cu ta defende su neishi contra parha mucho mas grandi, mescos Papiamento den curso di tempo a sa di defende su mes contra lenganan mas grandi.

   Apesar di reconocemento di otro parha, chuchubi ta sigui mustra su grandesa tur dia, mescos Papiamento, a pesar di promocion di otro idioma, ta sigui mustra su importancia tur dia. Chuchubi ta alegra nos cu su canto incomparablemente melodioso, mescos Papiamento ta un lenga cu tono melodioso manera nota musical. Chuchubi ta cana cu elegancia innato; chuchubi ta bula cu elegancia innato, mescos Papiamento ta bay dilanti cu zjeito, ta bay dilanti mahestuosamente. Chuchubi t’ey pa keda den nos naturalesa y sigui alegra nos cu su canto, mescos cu Papiamento cu t’ey pa keda den nos comunidad y pa siña nos apreci’e!

FLP a otorga Premio Chuchubi na:

Fundacion Bon Nochi Drumi Dushi pa su trabao di conscientisacion pa lesamento y di promocion di placer di lesamento.  Señora Olga Buckley, fundador di e organizacion aki, a ricibi e premio di Swinda Schwengle, miembro di FLP.

Sr. Otilio (Titi) Davelaar d.f.m. – postumamente – pa su amor pa Papiamento, su pen critico y su lucha pa bon uzo di Papiamento, specialmente den prensa. E yiunan di Sr. Otilio Davelaar d.f.m. a ricibi e premio di Pedro Velásquez, miembro di FLP.

Departamento di Enseñansa Aruba  pa su vision, estudio y perseverancia pa promocion y desaroyo di Papiamento. Señora Annemarie Proveyer-Groot, directora suplente di Departamento di Enseñanza, a ricibi e premio aki di Joyce Pereira.

Despues di entrega di premio Maritza Everon-Petrocchi, docente di Papiamento, a declama algun poema cu un zjeito y gracia cu a laga e invitadonan cu gana di scucha mas.

Sr. Gregory Goedgedrag, docente di Papiamento, a deleita e publico cu un presentacion musical y e no a keda sin canta e cantica “Chuchubi”.

A cera e anochi cu un momento social ameno bou di tono di saxofon presenta pa Sr. Jean Paul Carrasquillo.

FLP mester gradici diferente persona y instancia pa nan aporte na e anochi exitoso aki:

Etlien Croes y Lillian Hernandez pa nan trabao como Maestra di Ceremonia, Maritza Petrocchi-Everon y Selvia Lumenier pa nan poemanan y declamacion, Gregory Goedgedrag y Jean Paul Carraquillo pa nan musica, IPA pa uzo di su salanan, Ingrid Kuiperdal y Joe Brooks pa nan sosten logistico y tecnico, e fotografonan Don Quant, Robert Pereira y Famous Diaz.

FLP ta gradici tambe e publico pa su donacion financiero asina spontaneo y generoso.  

Fundacion Lanta Papiamento kier duna tur papiado di nos idioma Papiamento cu e siguiente mensahe:

Nos tur, papiado di Papiamento, lo mester tin un conocemento amplio di nos idioma y mester ta consciente di su balor, pa por yud’e haya e luga cu e merece den tur elemento di nos cultura, particularmente den nos enseñansa.

- Advertisement -

DUNA COMENTARIO

Please enter your comment!
Please enter your name here