Parlamentario señora Lorna C. Jansen-Varlack
ORANJESTAD (AAN): Fraccion di MEP e ultimo simannan a scohe pa haci nan rueda di prensa na lugarnan unda desaroyonan positivo den pueblo ta tuma lugar. Proyectonan cu ta worde haci den tur bario di Aruba pa eleva e calidad di bida den e areanan cu pa hopi aña a worde neglisha. Tur caminda nos por ripara cu e Fraccion di MEP ta expresa nan mes hopi negativo pa cu e desaroyonan cu ta tumando lugar den e diferente bario.
E habitantenan di e barionan cu nan ta bishita no ta tuma e grupo aki na serio pasobra nan ta conciente di e actitud negativo cu e fraccion aki tin pa cu e proyectonan innovativo cu Gobierno tin pa nos pais y pueblo ta condena e negativismo aki.
Por fin pueblo ta mira cu tin un Gobierno cu a priminti cu nan lo trece e cambio y esey nan a cumpli tambe. Tin mehoracion tur caminda pa cu infrastructura y drechamento di edificionan.
E edificionan cu ta worde drecha ta edificionan di Gobierno cu MEP den pasado a pone un banda pa despues bay huur edificionanan di famia y paga prijsnan hopi halto.
Famianan a bira mas rico y pueblo a sigui bira mas pober. Sin misericordia pa pueblo nan a firma contractnan pa varios aña pa mara pais Aruba pa sigui paga e huur astronomico pa luna. Friends & Family a gana miyones di placa di pueblo asina.
Awe, ora Gabinete Mike Eman cu si ta traha pa e bienestar di pueblo en general Fraccion di MEP kier hunga un wega barata pa descredita esaki. E ta di compronde si pasobra ora como lider di Partido di MEP, desesperacion ta cuminsa drenta bo curpa, bo mester haci todo por todo pa purba saca bo mes for di e desaster cu e partido ta pasando aden.
Tur hende ta conciente cu eleccion 2013 ta den porta y cu e posicion di e Lider di MEP te awor ta hopi debil pa no bisa cu e ta sigui deteriora dia pa dia. Tur hende ta conciente cu proyectonan ta tuma hopi tempo y cu bo por confronta contratiempo cu consecuencia cu lo tin tardansa pa cu e proyectonan.
E argumentonan barata pa purba influencia pueblo ta cay na oreanan sordo. Loke ta importante pa pueblo ta cu porfin tin desaroyonan den pueblo y pa pueblo y cu nan a worde alivia di e malgobiernacion di MEP .
