Investigacion di fiscal riba actuacion di polis encuanto sospechoso cu a muri na Nuñe
ORANJESTAD(AAN): Polisnan cu a atende e persecusion despues cu a duna senjal pa un chofer para awor ta bao investigacion. E caso a sosode diahuebs marduga.
Segun informacion despues cu a dune senjal y el a manda auto riba polis a cuminsa e persecusion. Na Ponton el a cuminsa y termina den area di Nuñe na Paradera.
Polis a haya nan mes cu un sospechoso cu a resisti fuertemente. Naturalmente di ambos banda parce tin sla a cay y por a mira cu tabata tin sanger riba dashboard di e auto pero tambe sanger riba pañanan di e polisnan.
Diripiente e polisnan a cuminsa pidi refuerzo pa ambulance cu urgencia mirando cu e sospechoso no tabata reacciona. A kere cu el a haya un atake di curazon.
Ademas a haya droga den su poder y suma di entre 2.000 cu 3.000 Florin. A papia di overdosis tambe. Na Hospital dokter a constata morto. Riba panja y den auto di e sospechoso no a topa algo cu por identifica e sospechoso. A bay na un apartamento unda e sospechoso ta kedando y parce cu aki esun cu ta huur e apartamento tampoco sa nomber di su cliente.
Fiscal di ministerio publico a tuma e curpa den beslag pa asina saca afor di kico e sospechoso a muri exactamente.
Kier saca afor cu si e actuacion di polis por ta e causa di morto di e sospechoso ora cu el a resisti contra nan. Awor polisnan ta bao di bista di ministerio publico y si resulta cu nan a actua bruto cu consecuencia fatal e por tin consecuencia pa nan. Merdia ainda no tabata na altura kende exactamente e persona aki tabata.
