Ley di fondo pa drecha producto di turismo cu hopi atencion pa pariba di brug
Parlamentario Clarisca Velasquez
ORANJESTAD (AAN): Segun Clarisca Velasquez di AVP, den parlamento a trata e ley di TPEF cu ta ley cu ta regla e presupuesto cu ta bai inverti pa drecha nos producto “Aruba” y fraccion di AVP ta conciente cu turismo ta e pilar mas importante pa nos isla y pesey a atende e reunion aki cu tur seriedad y a haci hopi pregunta na nos minister encarga cu turismo y a hanja e contestanan conciso y al caso tambe!
Loke a resalta for di e reunion aki ta cu hopi atencion ta bai wordo duna pariba di brug. Por a nota cu fraccion di Mep grandemente ausente den e reunion importante aki cu ta trata ley asina importante pa nos pais.
Den e fondo aki ta regla subsidio pa e tan conocido Carubbian Festival cu a bira un exito cu nos artesanonan local cu ta duna nan e oportunidad pa bende nan obranan na nos turistanan cu awor ta wordo stimula pa bai e actividadnan aki na San Nicolaas.
Tambe awor tur propaganda cu ta promove nos isla e districto aki di San Nicolaas ta aden pa asina promove e districto aki tambe na nos turistanan. Tambe pronto lo habri un oficina di ATA cu lo bai bira un centro di informacion pa turistanan.
Tambe ta bai drecha canto di lama na Savaneta bandi unda famia Paalman su residencia ta. E inversionnan aki ta na bienestar di nos turismo y claro pa nos hendenan local por disfruta.
Fraccion di AVP ta sostene e ley aki y e maneho di nos minister di turismo votando pro e ley aki cu ta na bienestar di nos comunidad y cu e minister sigi cu su maneho dinamico na bienestar di nos turismo!
