Lider di fraccion di PDR no a presenta pasobra fraccion di AVP no a dune reconocemento
Pa motibo di falta di quorum tratamento di presupuesto 2012 di TPEF no a continua
ORANJESTAD (AAN): Diahuebs merdia e reunion publico den Parlamento pa trata presupuesto 2012 di e Tourism Product Enhancement Fund (TPEF) mester a continua, pero lamentablemente esaki no a sigui pa falta di quorum.
Minister Otmar Oduber a lamenta profundamente e sucedido aki, cu ta algo cu masha poco ta mira ta sosode den un Parlamento serio caminda cu segun e por a compronde tin un compromiso haci entre fraccion di AVP y otro fraccionnan. Esaki mirando cu lider di fraccion di AVP ta sufriendo di un kebrante di salud, mientras cu dos miembro di e fraccion ta den exterior pa trabaonan di Parlamento mes.
E minister por a compronde cu Sr. Andin Bikker a duna sosten como fraccion di PDR y tambe Señora Mervin Wyatt-Ras como independiente, pero lamentablemente Sr. Andin Bikker no a presenta pasobra e ta buscando un reconocemento for di fraccion di AVP. door cu e no a haya e reconocemento aki, el a tuma e decision di no participa den e reunion publico aki cu ta trata un topico asina importante manera ta e TPEF. Banda di dje por compronde cu e no lo participa tampoco den e reunion publico cu ta planea pa diabierna mainta, pa trata e Travel Promotion Levy (TPL).
Minister Oduber ta lamenta e posicion aki profundamente pasobra ta trata di dos ley importante cu ta na beneficio di Pais Aruba. TPEF ta e fondo di mehoracion di Producto Aruba caminda cu tin un suma di placa cu tin cu worde inverti pa mehora un cantidad di facilidad pa loke ta trata nos turismo, manera life guards pa baby beach, boeinan cu tin cu worde poni eynan y señalizacion entre varios otro proyecto. Mester bisa cu gran parti di e presupuesto aki di TPEF ta destina pa San Nicolas y vecindario.
E otro proyecto cu mester worde trata diabierna mainta ta esun di TPL ccu ta contribui na fondonan di ATA SG, scapando Gobierno un cantidad di placa. E ley aki ta pa bin cu un cobranz di 10 Dollar riba ticket di turistanan, es decir, e no ta conta pa pueblo di Aruba.
Pesey e mandatario ta bisa cu lamentablemente oposicion ta mustra e actitud cu no ta sostene pa un presupuesto pasa cu ta puramente pa proyectonan na beneficio di Pais Aruba y cu gran cantidad di nan ta den area di San Nicolas.
Minister Otmar Oduber a bisa cu e no ta compronde ki reconcemento e miembro di fraccion di PDR ta referi na dje, pasobra reconocemento como politico un persona ta haye for di pueblo, for di votadornan, pero cu e ta prefera pa laga e tema aki pa Parlamento mes atende cune.
Finalizando el a expresa un biaha mas cu e ta lamenta cu e dos leynan aki cu por a finaliza e siman aki pa e proyectonan por a cuminsa anda di biaha, pa motibo di actitud den oposicion no tin sosten pa realiza e reunion publico den Parlamento. El a gradici Señora Mervin–Wyatt-Ras y Señora Marisol Lopez-Tromp cu a mustra riba e hecho cu nan lo duna sosten na fraccion di AVP pa e reunionnan por continua.
