Diario Online

Masha Yamada Di Protesta Contra Ferry Di Venezuela

Publication: Tuesday, 12 June 2012. Categoria: General

ORANJESTAD(AAN)– For di mainta te anochi, DIARIO ayera a ricibi yamadanan di lectornan cu ta masha rabia cu tin deliberacionnan tumando lugar pa reactiva ruta maritimo entre Aruba y Falcon cu ferry.

Casi tur a mustra nan malcontento y hopi tabata tin e mes reclamonan cu a compila aki.

Mayoria di esnan cu a reclama tabata tin tambe experiencianan malo di tempo cu Aruba tabata ricibi bishita di e ferry Almirante Luis Brion y tambe tin cu a mustra di e fracaso di otro ferry cu mester a bini Aruba regularmente despues y no a sigui.

Casi tur a menciona e bañonan sushi, bao di por lo menos 5 cm di awa cu sushi di hende flotando riba suela y mey mey di holo masha desagradable.

Tambe mayoria a mustra cu nan no kier mira ningun “ferry chavismo” manera nan a denomina esaki indicando na mes momento cu Aruba no kier nada di comunismo riba e isla aki y otronan a mustra riba e noticianan di cada fin di siman di e criminalidad na Venezuela y a laga sa di no kier mira na Aruba atracadornan, ni otro criminalnan cu lo probecha di e viahenan aki pa bin haci nan fechoria riba Aruba..

Ultimo lunanan ta mira caba cuanto dollar falso ta wordo confisca di venezolanonan na casinonan y den comercio y sigur ta cu ta hopi criminal lo haci uso di e posibilidad di pasa placa falso na Aruba cu binimento di un ferry pero hopi lo busca manera tambe di keda ilegal riba nos isla y cu despues lo tin dificultad pa saca nan tambe.

E criticanan contra e ferry for di Venezuela a mustra tambe riba e autonan cu lo bini y cu e chauffeurnan no conoce nos reglanan di trafico, y lo haci manera nan tin custumber den nan pais di core iresponsable, como loco y causa masha peliger riba nos cayanan cu ya ta yena cu vehiculo.

E parti di comercio tambe a wordo hopi comenta cu lectornan apuntando cu hopi di e pasaheronan lo bini di Venezuela cu mercancianan pa bende, sin permiso pa haci esaki, pasa cas pa cas sin paga impuesto y no por haci ningun reclamo despues .

“Kico bon nan tin di trece pa bende si na Venezuela mes supermercadonan ta bashi y cu ni lechi no por haya”, ta loke por a tende di varios di nan tambe.

“Nos no kier tin nada di haber ni cu comunismo ni cu chavismo y ta bon pa haya sa kendenan ta doño di e ferry y si no ta alegadonan di gobierno mes”, a comenta ademas.

Venezolanonan mester wordo exigi visa pa bini Aruba y no entrada liber. Esnan cu tin visa americano lo por wordo exclui di esaki, pero pa tur otro mester exigi visa. Hopi venezolano ta considera Aruba como un paraiso, y riba e paraiso aki gobierno mester pone pia abao tambe y pensa solamente riba voto, pero tambe tene cuenta cu reclamo di su ciudadanonan, varios a indica.

Sigur ta cu hopi hende no kier mira e ferry aki y ta spera tambe cu gobierno lo no duna permiso tampoco ni pensa di reactiva e ruta maritimo entre Aruba y Estado Falcon cu otro ferry. “Gobierno mester pone un stop na e intento aki for di awor y scucha nos”, un di esnan cu a protesta contra e ferry a laga sa ademas.