Diario Online

Mester di mas splicacion tocante e trein o tram o trolley

Publication: Tuesday, 19 June 2012. Categoria: Editorial

EDITORIAL

                Hopi di nos ainda no ta compronde e motivacion tras di e trein (lagami sigui yame asina pasobra ta asina el a ser presenta for di un principio) pasobra su utilidad pa e isla no a ser bon defini. Nos ta compronde cu e idea basico su tras ta di transporta turistanan for di waf te e parti mas pariba di Caya Grandi, unda poco di nan sa yega normalmente, pero tirando un bista riba e tiendanan cu tin den e sector limita ey, ningun luz ta cende pa ilumina, y mucho menos hustifica, e razonamento ey. Nos no ta mira nada, pero absolutamente nada eynan cu por sirbi di atraccion pa e turistanan cu ta yega nos isla via laman. Y ta mi opinion cu e tipo di turistanan ey no ta bin pa haci compra, sino pa conoce e partinan di Aruba cu nan tempo ta permiti nan bishita, specialmente nos beachnan cu tin caba fama mundial di ta entre e 10 mihornan na mundo.

                Otro cos cu ta scapa di mi comprension ta e cantidad di trabaonan cu ta ser haci den centro di Oranjestad, sin cu por a mira te awor e conclusion di maske ta un di nan! Loke si nan a crea ta un confusion grandi, y un disgusto di e mesun tamaño cerca masha hopi conductor cu mester usa e cayanan blokea pa yega nan destinonan, y simplemente no por pasobra casi tur e flechanan (o sea direccion di trafico) a ser cambia. Y pa colmo a construi algun polis di cement o beton suficientemente halto pa prohibi cierto tipo di autonan pasa riba nan sin problema. E idea di crea seguridad via nan ta bon, y nan ta yena cabalmente e funcion ey, pero nan no ta laga di ta un estorbo o molester pa cierto clase di autonan chikito.

                Pa loke ta Caya Grandi, tin un buraco inmenso coba unda antes tabata tin asfalt, sin cu e motivacion su tras a ser splica satisfactoriamente. Y ningun experto financiero o economico a bin padilanti pa pronostica cu hechonan concreto, con e tiendanan den e caya ey ta bay sobrebibi 10 o 15 luna mas prome cu e trabaonan bin cla.  Di cu e ta bay ta un atraccion agradable pa localnan y bishitantenan ningun hende ta cuestiona, loke si ta bao discusion entre hendenan serio ta e beneficio comercial o financiero cu e lo aroha. Y tambe nos ta wardando riba e splicacionnan tocante con Pueblo mes ta bay sali faboreci cu e presencia di e trein. Kico e ta bay haci pe directamente? Cuanto oportunidad o ki clase di cosecha economico Pueblo mes ta bay por recohe di dje? Ta den ki forma un trein cu ta core di waf pa caya grandi y back ta bay contribui na e saco di Pueblo? Ta preguntanan cu tin mester di un contestacion serio y razonable, pa nos tur keda trankilo cu loke sea e trein ey ta bay costa pa instala, y djey pa mantene, bal e sacrificio di pasa den tanto molester tur dia.                 E idea di e escrito aki no ta pa critica, sino pa haya informacionnan cu te awor ta hopi scars, y pa compronde alavez e razonamento su tras. Mi tabata contra e idea di e trein for di un principio, y nada a surgi desde cu e trabaonan di destruccion di e cayanan den centro di Oranjestad a cuminsa, pa hacimi cambia di opinion. Mi ta concede e cerebronan tras di e proyecto e hecho cu e ta bay ta un bunita atraccion, por ta hasta algo unico den nos region, pero mi ta sigui sin compronde e utilidad comercial, financiero o economico di un proyecto di tal magnitud y costo. Transitando riba e cayanan di e capital di Aruba, mi no por evita di pensa cu si e monto total di loke e trein ta bay costa lo a ser inverti en cambio den drecha e cayanan, pone capanan di asfalt nobo y duradero, nos tur lo a keda hopi contento y mas cu nada otro, satisfecho cu e sacrificio di lora den tanto biradanan cu antes tabata prohibi, a bale la pena. Pero, manera cosnan ta, mi ta duda cu tin hopi hende alegre cu e cambionan cu a ser introduci, ni maske ta pa un tempo corto prome cu normalidad regresa den e cayanan di Oranjestad. E ta, al fin y al cabo, nos capital, nos pida geografía particular, y ta bon pa Gobierno suministra nos cu tur e splicacionnan cu por apacigua e intrankilidad cu tanto trabao pareu a ocasiona.