Mester pasa mas informacion posibel riba con por traha cu asbest pa evita contaminacion den aire
ORANJESTAD(AAN): Departamento di DTI tin atencion pa e asunto di asbest y e problemanan cu esaki ta trece. A base di e susedido na Noord cu pa motibo di un Down draft, dak di St. Anna School a worde destrui, cu tabata contene asbest, esey a crea un efecto.
Tabata tin proceduranan prome cu esey, pero no tabata asina amplio of asina completo pa por cubri tur e areanan.
Den entrevista cu Dominico Werleman den un entrevista a splica cu pa basta tempo nan ta buscando informacion pa update nan hendenan riba e asunto aki.
Conhuntamente cu un compania estableci aki, cu ta trahando riba siguridad laboral a organiza un workshop di 6 siman pa no solamente e empleadonan di DTI, pero pa tur e trahadonan di gobierno. Durante e tayer a revisa e procedura y durante e tayernan lo bin cu ideanan nobo cu input di full e grupo y yega na e procedura cu actualmente lo bay ta uzando.
E tabata un topico asbest en general pero awor a bin mas amplio riba otro puntonan cu tin di haber cu asbest… A bin cu un procedura riba dje cu yama Richtlijnen Verwijdering Asbest daken. Esey ta worde uza awor aki. Intencion ta cu a cuminsa mande pa tur compania cu ta haci e trabao aki na Aruba. Tambe a bin cu un sistema cu ta registra e companianan aki tambe. Intencion ta pa aña 2015 kier yega asina leu cu e companianan aki no solamente ta registra na DTI, pero pa nan tin un certificacion pa bisa cu berdaderamente nan personal y nan ekiponan ta adecua pa por haci e trabao.
No a keda eynan. Despues di e tayer, cada luna e grupo ta bin hunto pa toch keda den contacto cu otro si tin cierto cambio of informacion. Despues di esey tambe a organiza e mesun tipo di tayer aki, pero mas cortico, caminda a invita tur e companianan cu ta trahando den e verwijdering di e asbest mes of den nan trabao por haya nan cu asbest, por participa na e tayer aki. Tabata tin un grupo basta grandi di 15 persona cu a participa. A cuminsa cu un otro tayer diamars, caminda empresanan y cierto departamentonan di gobierno ta participando, demostrando e mesun interes, cu ta tin un duracion di 3 siman. E intencion ta pa e tipo di informacion aki sigui crece den comunidad.
Despues cu DTI a bin cu su proceduranan, SERLIMAR tambe a bin cu su procedura pa loke ta paketa e material di asbest, con bo ta transporte y una bes cu yega na e dump na Parkietenbos, caminda tin cu pone cu tur eseynan bao di cua condicion, pa asina evita cu e stof di asbest ta bay den aire y/of medio ambiente. Mester tin informacion cla con pa atende cu e tipo di material aki. Poco poco a cuminsa ripara cu e topico di asbest a sigui cana y haya su atencion necesario. Segun Dominico Werleman esaki ta un topico bibo. Di parti di Salubridad Publico, nan a bin cu un campaña di conscientisacion riba tipo di materialnan aki cu ta contene asbest.
Mester keda pasa mas informacion posibel na esnan cu ta traha cune y companianan tambe cu ta haya nan mes envolvi cune. No ta cuestiona di crea panico segun Dominico Werleman.
Si un persona su dak di cas ta hopi bieu, naturalmente tin indicacion cu e dak por ta di asbest, pero si mantene e dak den bon condicion, no mester preocupa cune. E stof di asbest ta bin liber si traha cu e material. DTI tin entendi cu na dump di Parkietenbos tin cierto seccion pa deshaci di e material di asbest… DTI no tin ekipo pa controla e aire ora tin informacion encuanto asbest den aire. Pero tin instancianan cu ta hacie. Asina mes tin cierto exigencia ora di desarma of destrui un luga cu tin dak di asbest.
Mas intacto posibel mester kita e dak di asbest y djey basha e luga abao… Si e structura ta asina bieu, cu e peliger ta mas grandi pa haci’e di e forma ey, loke ta worde haci ta cu e material mester worde muha totalmente y despues di esey por bay over na bash’e abao of kibre. Esaki ta pa evita cu e stof por bula.
