Ministerio Publico no a duna ningun informacion ainda encuanto caso fatal di Sandro Quandt
ORANJESTAD (AAN): Ayera ta net un siman cu e ciudadano Sandro Quandt a haye den problema cu polis y a fayece despues.
Manera ta conoci diahuebs marduga riba 8 di juni 2012 , segun informe polis a duna Sandro señal pa para, pero aparentemente e a neglisha e orden y a sigui persecution y a para na Papaya den area di Paradera.
A surgi confrontacion entre polis y e sospechoso, esaki ta debi, e a resisti contra su detencion.
E sospechoso a worde transporta cu urgencia pa Horacio Oduber Hospital y na Servicio di Emergencia, docter no por a haci nada mas pa e victima debi cu el a fayece. Consecuentemente, fiscal a ordena pa confisca curpa di Sandro pa investigacion.
E Patologo a worde solicita pa haci autopsia y pa determina oficialmente, kico a causa morto di Sandro.
Mientras Fiscal a instrui LandsRecherche pa inicia mesora cu investigacion, e polisnan cu a atende e asistencia lo mester worde scucha y si acaso tin testigo (nan) cu a presencia e locual a tuma lugar pa nan bin dilanti y duna nan version na LandsRecherche.
Manera ta conoci cu famianan ta exigi claridad pa sa kico a pasa cu nan ser keri. Aparentemente e recorte di e patologo lo ta cla y palabra ta keda na e fiscal encarga pa trece esaki dilanti.
Pa motibo te ainda ministerio publico no a duna cara pa con leu na ta y con ta bayendo cu e investigacion. E partido envolvi esta polis mes ta spera riba e investigacion cual ministerio publico a encarga LandsRecherche pa haci relaciona cu e locual a socede entre e victima y e polisnan riba e marduga en cuestion.
