Mocion pa gobierno mantene, desaroya y embeyese e costa y beachnan na Savaneta a worde aproba unanimamente den Parlamento!
Parlamentario Donny Rasmijn-AVP
ORANJESTAD (AAN): Durante di tratamento di presupuesto di Tourism Product Enhancement Fund (TPEF) den Parlamento di Aruba, Parlamentario Donny Rasmijn a presenta un mocion pa gobierno mantene, desaroya y embeyese e costa y e beachnan di Savaneta.
E districto aki ta un atraccion turistico caba na Aruba y e merece di haya mas atencion. “Den ramo di Horeca, Savaneta ta luci cu tres restaurant cu ta worde bishita diariamente door di un cantidad grandi di turista. Un di nan tin mas cu 5 aña riba e lista di Top 10 Restaurants na Aruba”, señor Rasmijn ta expresa.
Den e presupuesto di TPEF tin placa aloca pa entre otro desaroya, mantene y restaura beachnan y costa di Aruba. Fondo pa Desaroyo Arubano (FDA) tambe a pone 5.2 miyon Florin disponibel pa inverti den proyectonan pa drecha calidad di beachnan y costanan di Aruba. “Pero riba e lista di beachnan Santo Largo no ta aparece”, Rasmijn ta lamenta.
Durante di e reunion, Parlamentario Rasmijn a trece dilanti tambe cu e tuberia cu ta core for di refineria pa WEB ta mahos y peligroso y no ta permiti un bista pa nos costanan. Y cu mester bin cu un proyecto pa re-aloca e tubonan aki bou di tera pa asina nos costa por luci mihor of planta matanan di flor dilanti di e tubonan pa drecha e bista.
Aruba ta socio di Foundation for Environmental Education cu ta otorga e asina afamado ‘Blue Certificate’. E Parlamentario e expresa cu ta su deseo pa e beach di Santo Largo tambe boga pa e certificado aki cu ta worde otorga na e mihor beachnan di mundo.
E dictum di e mocion ta urgi gobierno lo siguiente: 1. Pa duna Savaneta e atencion necesario door di, mantene, desaroya y embeyese e costa y e beachnan di e districto aki. 2. Pa FDA aloca fondo pa inverti den proyectonan pa e costa y beachnan di Savaneta. 3. Pa aspira pa e beach di Santo Largo tambe por logra certificado di ‘Blue Flag’. “Nos gobierno ta haciendo un trabao sublime pa desaroya nos isla den un pais modelo riba diferente tereno y riba e tereno turistico tambe. Minister Otmar Oduber tambe ta di acuerdo cu e mocion cu lo contribui na mehora e producto turistico na Savaneta y mi ta sigur cu e lo cumpli”, señor Rasmijn ta reitira.
Melissa
Kico mas mester pa embeyese Santo Largo. E ta un bunitesa impagabel paso E NO TA HE-TOUCH TEINDA pa e maldito turismo! Cu amor e localnan ta cuid’e. Ya a caba cu e mangelnan na boca di Rooi Frances, Pos Chikito ta na beurt. STOP di KERE cu bo ta YUDA. Tur cos ta caba na MALTRATO y DESTRUCCION pa bin cu palmanan di Florida atrobe. Siña PROTEHA y RESPETA: UNDA RAMSAR A KEDA??? Unda boso wowo y curason ta?? POR FABOR SACA SANTO LARGO FOR DI AGENDA: KEDA LEU, NO TOUCH!!!!!