ORANJESTAD.(AAN): Un caso cu a keda reporta ta mustra cu tanto scolnan como Arubus y polis tin cu pensa con ta bay soluciona problema di arma na scol , den bus y cerca hobennan cu ta circula cu auto rond di scolnan pa busca bringamento.
Ultimo tempo por ripara cu situacion ta tenso na scolnan y cerca alumnonan y no por permiti cu mucha nan ta bay scol pa siña y pa motibo di menaza nan tin presenta cu obheto peligroso den rugtas pa defende nan mes..Aki ta sigui informe compila pa polis relaciona di un situacion recien cu a presenta na EPB Santa Cruz.
Central a dirigi di patruya Santa Cruz na EPB Santa Cruz y coordinador a reporta cu un obheto peligroso a wordo haya den rugtas di algun alumno y lo tin bringamento ta bay tuma lugar.
Polis no a vacila y nan a atende e caso mesora.
Segun informe suministra un docente a descubri den rugtas di un alumno un machete y den rug tas di un otro alumno un obheto pa los tire di auto. E docente a papia cu e dos alumnonan pa nan splica pakico nan tin e obhetonan den nan poder.
Nan a splica cu ta pa nan por defende nan mes contra di mucha hombernan cu ta bin busca nan problema.
E docente despues di a caba di scucha e argumentonan di e dos alumno, corectamente a confisca mesora e dos obhetonan peligroso.
Polis tambe a papia cu e dos alumnonan y nan a ripiti locual nan a declara cerca e docente.
Toch polis a atende e dos alumnonan riba nan comportacion locual ta e obhetonan y e docente a entrega polis esaki nan.
Un punto clave y interesante cu riba corto plazo lo por ta un solucion practico ta pa e bus cu ta transporta mucha nan di scol staciona dilanti por ta di school pa asina e mucha nan tambe por keda den cura di scol y docentenan tin mihor y bon bista ora nan subi e bus.
Ta asina cu despues cu scol termina e muchanan mester cana bay na un distancia y spera riba yegada di bus. Mientras esnan cu ta buscado di problema ta presenta y e asunto na dado momento ta sali for di man cu consecuencia serio.
Riba e mesun dia despues cu polis a caba di atende e asistencia a drenta informe na central di polis y e palabra “pelea” a wordo menciona.
Patruya di Polis Santa Cruz a presenta atrobe na e scol y un di alumnonan a declara cu un Toyota blanco modelo Tercel a presenta dilanti di e scol pa bringa cu un alumno.
Polis a controla e vecindario enbusca di un Toyota Tercel sospechoso pero sin resultado.
Casi un ora despues, central di polis a dirigi e patruya na altura di Taco Bell y Kentucky Fried Chicken cu lo a señala e Toyota blanco.
Den e auto segun e recorte di polis tabata tin 6 mucha homber.
Nan a wordo puntra tocante un que otro cu lo a tuma lugar na EBP Santa Cruz y nan a declara cu nan no a haci esaki y tampoco nan ta buscando problema.
Locual a hala atencion di e polisnan tabata cu den e auto nan a wak un bat blanco di baseball.
Cu permiso di e doño polis a listra e vehiculo y a descubri 6 staaf di hero cual polis a confisca mesora.
Durante control hiba a sali na cla cu e doño di e vehiculo falta pa paga belasting di e Toyota di aña 2012. Relaciona cu e investigacion e Toyota a wordo hiba na warda di polis Santa Cruz y e 6 stafnan di hero a wordo depone den deposito di arma.
