Home General Mundo cultural tipico a perde un gran musico den persona di Sr....

Mundo cultural tipico a perde un gran musico den persona di Sr. Edwin Hernandez

1
0
SHARE
- Advertisement -

Edwin un musico dedica na nos musica tipico. Kende a participa y a yuda otro musiconan, tanto grandi y chikito na varios festival aki na Aruba

ORANJESTAD (AAN): Minister di Cultura, Señora Michelle Hooyboer – Winklaar ta manda su palabranan di condolencia pa e mundo cultural musical Arubano y en particular na famia di Sr. Edwin Hernandez. Kende ta un musico cu for di jong a cuminsa cu su pasion grandi pa nos musica tipico.

   Siman pasa Aruba a haya e tristo noticia cu Sr. Edwin un gran musico, areglista y cantante a fayece na Colombia.

   Sr. Hernandez ta bini di un famia musicante di generacion y generacion, tanto su bisabuela, abuelo, mama, tata, rumannan, primo y primanan, subrino y subrinanan, tur ta musico y cantante cu ta domina diferente instrumento musical. Su yiu y nieto tambe ta sigui su pasonan riba tereno musical.

   Su tata Sr. Ishi Hernandez d.f.m. tabata un gran musico kende tabata domina accordeon y guitara tre. Su mama Señora Cecilia d.fm. tambe tabata domina guitara.

   El a forma parti di diferente agrupacion musical, tipico y folklorico na Aruba. Sr. Edwin a toca den Brassband ‘Hells Angels’, den steel band y beatband.

   Na edad di ocho aña El a cuminsa su carrera musical tocando riba su guitara traha di bleki azeta TRALALA…

   Na aña 1967 El a toca riba cuarta y formando parti di e agrupacion di Aguinaldo ‘ DE COLORES’. Sr. Edwin kende tabata compositor y a dedica varios composicion na nos pais Aruba. Su composicionnan y no solamente di su agrupacion ‘LOS AMIGOS’,  sino di diferente cantante a logra gana of clasifica, tanto den festivalnan di Dande, Tipico y Propio Composicion y esun di Dera Gay.

  Festivalnan hubenil y infantil tambe a conoce varios composicion di Sr. Edwin. El a compaña varios hoben y hobencita cu a logra na clasifica y gana den festivalnan.

   mr. Sr. Mito Croes, Minister di Cultura na aña 1988 a reconoce Sr. Edwin Hernandez y ‘Tipico Los Amigos’ pa nan contribucion di 20 aña manteniendo nos musica tipico Arubano bibo.

   Na 1996 Sr. Edwin Hernandez a gana e titulo ‘Tipico di Aña’, formando parti di ‘Tipico Los Amigos’.

   Durante, e di 25 Festival di Dande, Sr. Edwin a haya un reconocimento di e fundacion di Dande pa su aporte na e festivalnan di Dande, pa su logronan, su aporte y contribucion na nos cultura.

   Fundacion Festival di Dande riba dia 29 di December 2006 a dedica e di 33 festival na su persona den Club Caiquetio. Sr. Edwin a worde reconoci cu e titulo: ‘UN PILAR DI NOS FOLKLORE’ pa su contribucion y sosten na e cultura Arubano. E gran musico aki tin masha hopi plakkaat y trofeo na su cas como recuerdo di tur su exito musical y semper su portanan tabata habri pa duna conseho y a sa di prepara hopi cantante pa diferente festival.

Riba tereno internacional Sr. Edwin Hernandez a duna presentacion na Corsou, Boneiro, Maracaibo y Puerto Rico.

Riba tereno di deporte Sr. Edwin tabata un deportista hungando pa Junior League di Baseball pa e ekipo di PEPSI y futbol pa e ekipo di SCA di Paradera. Su districto caminda cu e tabata biba.

E tabata empleado na e imprenta ‘PROGRAPHICS INC.’ pa 44 aña. Aña di servicio cu el a caba di cumpli riba dia 11 di mei ultimo.

Minister di Asuntonan di Economia, Social y Cultura, Sra Michelle Hooyboer – Winklaar ta manda palabra di condolencia na su Señora Aurelia, yiunan, famia, amigonan y conocirnan. Tambe un palabra di condolencia na e mundo cultural musical Arubano.

Cu Sr. Edwin Hernandez sosega na Paz.

- Advertisement -

DUNA COMENTARIO

Please enter your comment!
Please enter your name here