Na final Oranjestad lo bira un ciudad emblema pa henter Caribe
Ingeniero Samuel Schwartz:
ORANJESTAD(AAN)– Na New York e prome mandatario di Aruba mr. Mike Eman tabatin un reunion cu Samuel Schwartz kende ta ingeniero y a traha riba henter e plan di renovacion y cambionan den centro di Oranjestad. E trabaonan ta andando awor aki y pronto lo tin e tram tambe cu lo bai core. Den entrevista cu Samuel Schwartz el a splica cu Oranjestad tin un historia unico y tin un localidad espectacular. Pero a confronta problema ultimo añanan caminda cu e bishitante, turista, no ta yega den e caya principalmente of por lo menos no ta pasa e caya completo.
Mayoria ta bay pa e area di compras na hotelnan.
E ingeniero a pensa cu mester crea un sistema cu ta conecta cu e hendenan cu ta bin di bishita. Localnan sa di e historia rico di Oranjestad pero esaki mester yega na e turista tambe, pa nan pasa tempo disfrutando di e historia.
Cu tempo, cu tur e cambionan cu ta wordo haci, e structuranan historico lo haya un bida nobo, e cayanan ta ideal, manera por ehempel Wilhelminastraat, pa bira un avenida di restaurant. Naturalmente na momento cu e tram cuminsa core, e turistanan lo yega centro di Oranjestad cu lo haya bek su importancia como un area “premier” pa haci compras. “Na final no solamente Oranjestad lo bira un ciudad di gran historia, pero tambe e ciudad di futuro, un emblema pa henter e isla y Caribe.
Un ciudad di un pais cu ta consciente di proteccion di su medio ambiente, caminda ta tumando decisionnan importante con pa converti energia for di biento; hacie un isla di siglo 21,” asina ingeniero Schwartz a comenta.
E experto ta kere firmemente cu na final e turistanan di mes lo cuminsa yega centro di e ciudad, ya cu nan ta sigui tur e cambionan, e señalnan y inclusive e ta kere cu lo no tin suficiente streetcar pa transporta e turistanan cu kier disfruta di e medio di transporte aki pa yega centro for di waf. No solamente lo bay mira cu mas hende lo bay haci compras den centro, pero tambe e bida nocturno lo ta mas dinamico.
E ta kere cu na final, e lo bay bira algo manera e ambiente cu tin na SoHo. “Tur hende kier ta den SoHo, cu mester a traha restaurant bou suela tambe,” el a indica. Naturalmente na momento cu e concepto aki trece su resultadonan positivo aden, caminda e economia ta mehora, lo capta atencion di otro islanan. E ta haya cu “mainstreet” mester kere cu nan por ta un “mainstreet” poderoso.
Ta na doñonan di e establecimentonan pa cambia nan pensamento cu “mainstreet” ta principalmente pa Arubianonan y cu turistanan ta shop den e areanan grandi di tienda banda di hotelnan.
“Mainstreet mester kere den nan mes y si nos por logra esey, y cu e hendenan di Oranjestad kere cu e luga ta uno hopi special, cu un historia rico, …. tur cos lo resulta y di berdad e lo ta e ehempel pa Caribe,” Schwartz a expresa. Cambionan, el a bisa, no ta tuma luga di nochi pa dia. Specialmente ora cu tin hopi construccion andando rond, e hendenan ta molestia. El a duna e ehempel di e area na New York unda e tabata para na momento di e entrevista, cu un tempo tabata un “slump” no mucho aña atras, y awor e ta un distrito caminda e edificionan ta caro pa biba den dje; esnan mas rico di New York ta biba eyden. “Bo mester kere den cambio, kere cu cosnan ta bira miho. Mira e inversionnan cu Gobierno ta haciendo den infrastructura y realisa cu eseynan ta inversionnan pa futuro. E ta un bon futuro pa Oranjestad y Aruba.” E ta kere cu semper ta bon pa trece cambio, renoba, y luganan cu stop crece ta esnan cu lo muri. Aruba tin un oportunidad pa bay bek den tempo pero cu un ciudad hopi moderno. E ta spera di por ta na Aruba den luna di december ora cu e streetcar cuminsa funciona, pa e haci su compranan di Pasco den centro di Oranjestad. Loke e por bisa cu e streetcarnan ta masha atractivo y ta hala atencion mesora.
