Pa con liher e mentira ta, e berdad lo sa di alcanse
Segun Lysander Besselink di AVP…
ORANJESTAD (AAN): Casi 4 biyon Florin extra, ta e suma cu gobierno anterior a adkeri den 8 aña di nan gobernacion y si analisa e proyectonan cu nan a ehecuta den comparacion cu e cantidad cuantioso di tur e placa cu nan a ricibi, pregunta lo bira; Kico enrealidad boso a haci cu tur e placa aki?
Si ta papia di transparencia, anto abo mes tin cu aplica esaki pa bo mes y bo partido. E articulo aki no ta pa mi critica, si no mas bien pa pueblo realisa cuanto placa e gobierno anterior a ricibi y asina mes a pasa un cantidad di medida contra e pueblo Arubano y esaki te dia di awe no ta comprendibel.
Pa no haci e storia aki mucho largo, mi ta djis recapitula encuanto di tur e placa cu gobierno anterior a adkeri durante nan 8 aña di gobernacion y cu pueblo no ta conciente di esaki.
Pa cuminsa, a ricibi for di Setar NV un suma rond di 100 miyon Florin, for di Radisson Hotel a ricibi rond di 75 miyon Florin, for di Hyatt Resort a ricibi rond di 135 miyon Florin, for di Plant NV a ricibi rond di 280 miyon Florin.
Na 2002 a ricibi un bono rond di 300 miyon Florin y otro mas na 2005 cu ta mas di 200 miyon Florin, for di WEB NV cu Elmar NV a chica mas cu 253 miyon Florin, cu medida di leges vergunning mas cu 1 biyon Florin. Cu medida di belasting a ricibi mas di 160 miyon Florin, por medio di e famoso BBO cu nan a introduci nan a ricibi mas di 500 miyon Florin.
E debe externo di pais Aruba entre 2001 pa 2009, Gobierno di MEP a aumenta esaki di 1.1 biyon Florin pa 1.2 biyon Florin, dus a ricibi 1.2 biyon Florin.
Asina mes cu nan a ricibi tur e placa aki, a corta den overtime di tur diensten incluyendo esun di polis, creando un situacion penoso den nos comunidad pa cu seguridad di nos Pais. Pa 2 aña a para Cuerpo Policial di recluta polisnan nobo, no a paga niun ambtenaar indexering, Brandweer awe ta sclama pasobra no a inverti den nan pa 8 aña largo.
E edificio di KIA tampoco a ricibi atencion debido y awe nos conoce su storia. E edificio di ex-Belasting Kantoor na playa a bira choller house, esun caminda voogdijraad tabata na playa tambe a worde poni disponibel na e chollernan. E edificio di ex-DOOV na San Nicolaas tambe a worde sera y a deteriora, mesun cos a haci cu e edificio di Korte como tambe e actual bestuurskantoor, esta e edificio cu awe tur 7 ministernan ta sinta aden.
Pa colmo casi gobierno anterior a bende e edificio di bestuurskantoor como tambe caya Grandi cu e unico meta di haya mas placa. Pero te dia di awe nan niun no por hustifica ta na unda a inverti casi 4 biyon Florin. Na momento cu Gabinete Mike Eman a sinta a haya e caha completamente bashi, pero asina mes den apenas 2 aña y mei di gobernacion ta remodelando pais Aruba den un pais cu lo bira uno di 5 estreya.
Como gobernantenan responsabel y serio nan a introduci e famoso versoberingswet y ta entrega parti di nan salario pa di e manera aki nan mes contribui cu e caha di placa di pueblo. Gabinete Mike Eman no a introduci ni un solo medida contra di e pueblo aki, asina mes cu a drenta gobernacion cu caha bashi, cu Valero sera y nos pilar economico di mas grandi debilita, esta turismo. Contrario na gobierno anterior cu ta un Gobierno di Medida so.
Gabinete Mike Eman a redobla e pensioen, a aumenta e kinderschool toeslag pa cada mucha, a aumenta onderstand, a duna indexering na trahadornan di sector publico como tambe e penshonado nan di OPPA, a laga WEB nv como tambe Elmar nv keda cu e defidendo y winstbelasting pa mantene e prijs di awa cu coriente abou pa nos pueblo, a aumenta minimumloon, enfermeronan di SABA porfin a ricibi un pensioen, cada pensioenado di SVB a haya un aumento, studiantenan cu tin un Aruba lening y cu bolbe Aruba despues cu nan termina nan estudio lo ricibi 30% di descuento riba nan lening, a duna un reparatie toeslag pa es nan di sueldo minimo como tambe a kita mitar di e BBO cu ta representa 86 miyon Florin pa aña, aliviando di e manera aki e cartera di pueblo y dunando e pueblo di Aruba e oportuidad back di por keda cu mas placa den su saco. Si Aruba no a conoce un cambio den gobernacion na 2009, awe niun di e cambionan positivo aki a tuma lugar. Esaki ta e unico berdad cu pais Aruba conoce, esta cu e gobierno di Gabinete Mike Eman si ta re-inverti placa di pueblo back den e propio pueblo.
