Pa habri dumpnan riba tereno priva Minister mester duna permiso y tin exigencianan den ley pa esaki!
Ing. Gisbert Boekhoudt di Medio Ambiente:
ORANJESTAD (AAN)—Den entrevista cu sr. Ing. Gisbert Boekhoudt, funcionario di Departamento di Medio Ambiente, a splica cu personanan cu tin tereno priva tambe tin cu cumpli cu cierto reglanan.
Si un propietario di tereno priva kier tin un dump eyriba of den su mesun cas, e minister concerni mester apunta e tereno of cas ey como un dump y mester tin un carta di e minister cu ta bisa cu e adres ey ta destina pa tira sushi.
Pero esaki no ta bay sin mas. Tin cierto rekisitonan cu e minister ta stipula, manera cu e lugar mester tin un entrada, entre otro exigencianan, pa e no causa molester of peliger ni perhudica otronan.
Ing. Boekhoudt a remarca cu pesey e ley ta bisa cu na unda e derecho di un hende cuminza e derecho di otro ta caba, y den e aspecto di medio ambiente e dumpnan ilegal ta afecta otro hendenan den nan salud, den nan bienestar, ademas cu e no ta bon pa nos naturaleza y mester tene cuenta cu esaki tambe.
Cu tur e aspectonan aki minister ta tene cuenta prome, cu e hendenan cu ta haci e peticion y kico ta rondona nan pa despues e tuma un decision.
Tereno priva kiermen cu tin un propietario, pero esaki no ta nifica cu e persona aki por haci tur cos riba dje, sin tene cuenta cu otro hendenan, y kico ta corecto pa haci e ta describe den e ley, Ing. Boekhoudt ta reitera.
Recientemente e dump na Seroe Patrishi y esun di Gavilan a worde apunta pa e minister, pero esun na Jaburibari a worde hala back pasobra el a yena. E dump di Parkietenbos ta apunta for di cinco pa seis aña pasa.
El a agrega cu departamento di Medio Ambiente ta vigila e diferente lugarnan y ta raporta na e minister, pero tambe nan ta aconseha pa traha cu otro departamentonan cu tin algo di bisa riba e tereno aki.
Ing. Boekhoudt a indica cu tin lugarnan cu ta worde cobra pa saca santo, grace of granit, gradualmente ta crece, desaroya y bira un lugar pa benta sushi ilegalmente.
El a menciona cu pa coba no mester di un permiso pero pa yena e buraco cu sushi si mester di e carta di e minister, y hopi hende cu ta coba ta kere cu nan tin e autoridad automaticamente pa yene back, pero esaki no ta e sistema con nos ley ta hinca den otro.
Departamento di Medio Ambiente tin bista riba e terenonan aki, y su recomendacion ta pa tur hende cumpli cu loke e ley ta prescribi y pa gobierno pone e condicionnan pa esaki no haci daño na otro hendenan ni e vecindarionan.
