Parlamentario Arondino Croes a insulta trahadornan di DOW
Minister Oduber:
ORANJESTAD (AAN): Diaranson tabatin reunion publico den Parlamento pa trata presupuesto 2012 di e Tourism Enhancement Fund (TPEF) pa cual Minister Otmar Oduber tabata presente.
Loke a hala hopi atencion ta e manera baho con integrantenan di fraccion di MEP, specialmente Arondino Croes, a insulta trahadornan di DOW den un forma baho caminda a cataloga nan di incapacita.
E parlamentario papiando di construccion di Linear Park a bisa cu den e construccion a constata hopi fayo y cu e calidad di trabao no ta corecto. Cu e palabranan aki loke Arondino Croes ta haciendo ta insulta trahadornan di DOW cu ta controla e calidad.
El a kere cu e por insulta Minister Oduber cu e declaracionnan aki, pero parse cu den su afan pa haci politica y kibra un minister cu a bin ta trahando hopi duro pa hiba Aruba dilanti, el a lubida cu e minister no ta esun cu ta controla e trabaonan di construccion, esey ta trabao di ambtenaarnan cu ta traha na DOW, di e forma aki el a insulta esnan cu ta gana nan pan trahando na DOW.
Minister Otmar Oduber ta lamenta masha hopi mes e tipo di actitud aki caminda ta insulta trahadornan cu dia aden dia afor ta haci nan trabao simplemente pa haci politica barata.
E ta considera cu a yega momento pa esnan den oposicion cuminsa hiba un politica constructivo en bes di uno destructivo pa cual nan ta conoci pe caba, pero awor a bay asina leu di hasta insulta trahadornan cu ta realiza nan trabao na e forma debido pa sigui cu nan racha di destruccion na un pais cu ta den pleno mehoracion den tur sentido.
