Presentacion di Juanes y Marc Anthony ya caba ta wordo premira como e concierto di e decada
Jonathan Vieira
Actornan Jason Patric y Xavier Samuel tambe lo ta yegando Aruba pa AIFF!
ORANJESTAD (AAN): Jonathan Vieira, e persona tras e organizacion di Aruba International Film Festival (AIFF) tabata presente ayera atardi durante un conferencia di prensa na e waf di container, cual a worde converti den e asina yama Harbor Arena.
Akinan lo tuma lugar e conciertonan di Juanes y di Marc Anthony e fin di siman aki.
Vieira a manifesta cu nan ta preparando pa e yegada di media internacional cu lo ta presente durante e festival di cine. Banda di esaki el a confirma e yegada na Aruba pa AIFF di dos actor mas cu ta Jason Patric, kende a actua den e pelicula Speed y Speed 2: Cruise Control (cu Sandra Bullock) y Xavier Samuel di e famoso “Twilight”. Akkon tambe lo join DJ Chuckie diasabra anochi
Di tur banda nan ta hayando mas presion pa loke ta e organizacion, a enfatiza. E ta hopi contento cu loke ta tumando lugar. Su team ta chikito pero hopi eficiente, Jonathan a señala.
E fondonan recauda, a splica, ta fondonan cu nan lo usa pa promove y traha riba e parti educacional di e festival di cine, cu e film lab, cu e tres mil muchanan di school cu a bay wak pelicula.
Banda di esaki e organizador di AIFF a laga sa cu e actividadnan e weekend aki lo cuminza cu e red carpet cu presencia di Virginia Madsen pa 6:30 pm na Paseo Herencia.
Despues di esaki, tur hende lo por cuminza bay na e Harbor Arena pa e concierto di Juanes. Portanan lo habri 9’or di anochi y e presentacion di Juanes ta programa pa 11’or.
Jonathan Vieira a laga sa cu Marc Anthony ta yega awe diabierna mescos cu Chuckie. Pa diadomingo tin e ultimo anochi di concierto y despues lo tin Raymann na Cas di Cultura e siguiente fin di siman.
Ta bon pa menciona cu e Harbor Arena lo por carga te hasta 10 mil persona. Corda yega na tempo pa asina bo haya un bon lugar.
Pa e prome anochi lo tin Roger Peterson cu su banda pa e apertura. Pa e di dos anochi, e opening act pa Marc Anthony lo ta na encargo di Marcos Bislip conhuntamente cu varios cantante local.
