Prome Minister Eman “Aruba, un isla chikito cu un perseverancia enorme”
Na prome simposio di Reino
ORANJESTAD(AAN): E simposio di Reino tabata di un exito inigualabel. Un grupo di orador selecto, cada un experto riba su tereno, un publico varia y interesa, e topico ‘nos relacion cu y e balor adicional di Reino” cu a core manera un liña cora den e discursonan y un ambiente formidabel a domina e dia.
E simposio a cuminsa cu un declamacion excitante di Caresse Issings, kende a laga e luga vibra cu su cantica apasiona treci den forma diferente.
Tanto e poesia como e cantica a worde skirbi pa e talentoso Caresse mes. Maestro di Ceremonia Ryan Peterson a haci manera semper un trabao sublime, a splica cu e simposio a worde organiza tanto pa Universidad como tambe pa Gobierno di Aruba.
Despues di algun palabra di introduccion di e rector di Universidad Glenn Thode, Prome Minister Eman a hiba palabra den un discurso impactante.
Prome Minister Eman a bisa cu pa loke ta e relacion cu Reino gobierno ta kere cu tin hopi oportunidad win-win pa tanto e parti Europeo di Reino como e parti Caribense. El a bay back den pasado y a recorda tur presente con dies aña pasa cu masha pasion el a papia riba e relacion cu nos kier tin cu Reino. Ningun hende a pone mucho atencion na ne e tempo ey. Eman: “Dies aña ta hopi tempo pa politiconan, pero no pa nos aki na Aruba.
E Arubiano tin hopi perseverancia. Asina e lucha pa Status Aparte a dura mas di 60 aña, mas cu dos generacion. Aki Eman a recorda cu su tata y abuelo a para na e cuna di Status Aparte, sin por a mir’e bira realidad. “Cu e lucha tabata asina largo no tabata door di apatia of falta di comprension den Reino”. Aki Eman a splica mescos cu historia ta papia pa su mes cu tur pais den Reino tabata fuertemente contra pa Aruba haya su Status Aparte. “Pero,… Aruba a logra su Status Aparte. Aruba cu un poblacion di 65 mil habitante e tempo ey a logra tambe pa dentro di dies aña haci dos bes cambionan den Statuut di Reino Hulandes.
Na 1986 ora Aruba a haya su Status Aparte y na 1996 ora cu e menaza di independencia tabata colga riba nos cabes. E fecha a worde saca di Statuut. Danki na esaki cu awe ainda nos ta forma parti di Reino Hulandes. Un isla chikito cu un perseverancia enorme”.
Eman di cu e ta spera cu e perseverancia aki por yuda nos den tin mas y miho oportunidadnan den Reino. Pasobra esey ta loke Aruba ta pidi p’e. “Nos no mester haci cambio den Statuut, pasobra nos ta satisfecho cu nos status. Ta pesey cu nos ta preocupa cu cierto expresionnan politico haci na Hulanda pa cambia e Statuut den un ‘Gemenebest’.
Esaki por haya e forma di un Statuut, pero e por pone tambe riba ‘los zand’ henter e structura di cooperacion den Reino y percura asina pa e comienso di e final”. Eman a adverti cu nos mester ta masha prudente pa cambia e Statuut den un Gemenebest. Nos tin e libertad y e siguransa cu Reino ta ofrece nos dentro di Statuut”.
Eman: “Nos agenda pa loke ta Reino ta conoci. Mesora cu nos a drenta gobierno nos a pone nos vision den un nota “Visie Arubaanse regering op het Koninkrijk” y nos a comparti esaki cu nos partnernan den Reino”.
“Nos ambicion ta grandi. Nos kier redefini Reino (publica den e proefschrift di dr. Mito Croes). Aruba den su vision pa un Reino nobo a hinca hopi tempo y atencion den su ideanan y con trece nan den practica pa asina por construi un Reino nobo. Esaki door di redefini Reino den un partnership strategico den un partner Europeo grandi y un partner Caribense chikito. Na unda conscientemente ta busca synergia y un situacion win-win pa tur partner den Reino”. Eman a splica cu den e 58 aña desde cu nos tin Statuut nos no a logra traha un agenda pa Reino. Esaki door di e relacion dificil cu e partnernan y incidentenan cu a domina e esfera. “Nos por miho y pa loke ta Aruba ‘nos mester haci miho”. Loke nos no mester ta un cambio di Statuut, pero un cambio di pensamento riba e relacionnan den Reino. Loke nos mester ta e deseo politico, e disponibilidad pa hunto traha riba e direccion na beneficio di tur partner den Reino y creatividad. Un ‘out of the box pensamento’ na unda nos no ta pensa riba nan y nos, pero nos y nos”.
