Home General Prome Minister Eman “Evaluacion S & P ta muestra cu Aruba...

Prome Minister Eman “Evaluacion S & P ta muestra cu Aruba ta riba bon caminda”

0
0
SHARE
- Advertisement -

ORANJESTAD(AAN)— Cu Gabinete Mike Eman ta haciendo un trabou sublime ta bisto y a keda confirma un bes mas cu e ultimo evaluacion di Standard & Poor’s. E agencia internacional di evaluacion di renombre cu ta riba e mesun liña cu Fitch Ratings y Moody’s a haci un evaluacion un bes mas di Aruba den un periodo cortico cu un resultado faborabel. Aruba ta mantene su rating di A-/A-2 cu un perspectiva positivo. Un grato noticia. E rating aki cu a wordo presenta na gobierno dia 8 di juni ultimo a wordo logra a pesar di e paro di produccion di Valero. E inspectornan di Standard & Poor’s a indica cu economia di Aruba a recupera masha lihe despues di e recesion di 2009/2010 cu un crecemento economico di casi 9% aña pasa.

Segun Standard & Poor’s Aruba ta un ‘economia prospero’ den un democracia stabil. E resultado aki ta hiba Aruba dilanti cu pasonan grandi y determinante. Ora cu Gabinete Mike Eman a tuma rienda di pais Aruba dia 30 di oktober 2009 cos tabata pinta scur pa economia di Aruba. E gobierno cu a caba di sinta a hay’e confronta cu retonan grandi.

Miembronan di Gabinete Mike Eman a mustra mundo eyfo cu nan a drenta gobierno cu un mision fiho nan dilanti. Mehora e situacion financiero economico malo di Aruba cu nan a bin haya. E evaluacion di S&P’s ta muestra di un mision cumpli dor di hendenan cu vision y stimacion pa nan pais y nan prohimo.

S&P’s ta spera cu reapertura di e refineria, e perspectivanan economico positivo y e maneho di reformacion di gobierno ta conduci na un reduccion di e debe nacional bou di e limite di 50% di e producto interno bruto cu un deficit financiero cu despues di 2014 ta yega bou di 3%. S&P’s ta sali di e punto di bista cu si reapertura di e refineria tarda algun luna mas, cu gobierno sa di tuma e pasonan adecuado.

Prome Minister Mike Eman a reacciona masha contento cu e evaluacion positivo di S&P’s. “Esaki ta algo masha excepcional mirando e hecho cu hopi otro pais den region pero tambe paisnan grandi manera Merca y Francia ta hayando evaluacionnan decepcionante. Esaki ta muestra cu Aruba ta riba e bon caminda cu su maneho economico”.

Minister di Finanza, Comunicacion y Utilidad Mike de Meza ta spera cu traspaso di e refineria pa PetroChina pronto ta bira un realidad. Valero y PetroChina mientrastanto a yega na un acuerdo pa loke ta e suma di compra y gobierno y PetroChina a firma un Memorandum of Understanding.

Aña pasa na luna di november S&P’s a cambia e perspectiva di Aruba di negativo pa positivo. Motibo pa esaki tabata e reformanan di fondo di pensioen y seguro medico y e efectonan di inversionnan den renobacion urbano y mehoracion di bario di e programa BoAruba.

- Advertisement -

DUNA COMENTARIO

Please enter your comment!
Please enter your name here