Sindicatonan ta duna gobierno te diasabra atardi pa sinta na mesa!
Fondonan di APFA completamente na peligro:
ORANJESTAD (AAN) – Cu caracter di urgencia, e gremio sindical a yama un conferencia di prensa, den cual señor Diego de Cuba, presidente di STA a hiba palabra den nomber di tur e sindicatonan cu tin miembronan den e aparato gubernamental.
Esaki despues cu diahuebs mainta e sindicatonan a reuni cu Fondo di Pension (APFA), nan a sali masha preocupa ya cu e fondo di pension ta na peligro.
Diego de Cuba a señala cu lamentablemente e sindicatonan a wordo informa pa APFA riba e situacion penoso cu tin, y cu e sindicatonan ta haya cu inhustamente esnan cu ta aportando na e fondo tin cu bay sufri e consecuencianan, mirando loke e instancia aki tin den plan pa bin cune.
A base di esaki e sindicatonan a reuni na SIMAR pa 2’ or di atardi, pa nan trata di yega na un consenso pa wak kico e siguiente paso pa tuma ta bay ta, y nan a dicidi cu nan ta bay bati na porta di gobierno, y nan ta hincando un carta den otro cu nan ta bay entrega na gobierno, y ta bay exigi un reunion den 48 ora, mirando e gravedad di e situacion.
Diego de Cuba a subraya cu e momento a yega pa bati na porta di gobierno, y hecho ta cu e mesun director di APFA a bisa cu nan ta mas cu un aña laat, y e ta kere cu sindicatonan no por duna mas espacio pa loke ta pasando aworaki, y si nan por compronde cu gobierno no ta traspasa locual tin cu traspasa pa APFA, y mirando cu e debe ta asina grandi, riba 700 miyon florin cu aworaki mester a yega 800 miyon, y si ta papiando di un cantidad di diez mil miembro di cual e ta asumi cu cuatro mil ta cobrando pension caba, y seis mil ta bezig poniendo placa den e fondo pa nan por cobra nan pension ora nan ta hubila, y si dividi e suma aki di 800 miyon florin for di 10 mil nos ta papiando di 80 mil florin pa cabes.
Diego de Cuba a subraya cu e situacion aki ta grave! Diahuebs tur e sindicatonan cu ta representa empleadonan di Gobierno manera SPA, SIMAR, OPPA, TOPPA, etc., tabata presente, y Diego de Cuba a subraya cu e ta convenci cu esnan cu no tabata presente lo bin tambe na e siguiente reunion, cu ta esun cu nan a pidi cu gobierno.
De Cuba a subraya cu nan no por sigui laga e situacion aki bay asina sin mas, pasobra e no nada dushi pa bin tende cu aki tres luna, specialmente esnan cu ta cobrando pension caba, ta bay tende cu e suma cu nan ta cobrando awor ta bay baha cu algun cien florin, pasobra nan ta bezig cu un plan di recuperacion y nan tin cu kita un tiki placa pa pone den e caha di APFA. Esnan cu ta pagando caba lo mester bay paga mas anto haya menos.
El a reitera cu ora a yega pa bati e porta duro di gobierno, papia palabra cla cu nan, y tuma accion, pasobra esaki no por sigui asina. De Cuba tin entendi cu poco tempo atras a saca 100 miyon for di e fondo pa duna un grupito pa nan bay haci negoshi cune, sin autorizacion di ningun hende cu ta contribui. Segun de Cuba tin cu bay cambia e structura di APFA completamente, pasobra e situacion no mester sigui asina y e structura cu tin actualmente, no ta funciona manera mester ta, pasobra e miembronan cu ta paga pa e fondo no tin bista riba loke ta pasando.
Gobierno tin te diasabra atardi pa concede e sindicatonan un reunion.
