Aruba tin companianan cu tur experiencia pa hacie:
STA den desacuerdo cu gobierno pa otorga companianan proyecto Green Corridor
ORANJESTAD (AAN) – Sindicato STA, lidera pa señor Diego de Cuba, den entrevista cu Matutino DIARIO, a referi na e reunion cu e sindicato tabata tin cu Prome Minister Mike Eman, Minister di Infrastructura, e delegacion di WAB y e shopstewardnan cu ta representa e trahadornan den e tres companianan di WAB, cu ta afilia na e sindicato STA.
De Cuba a señala cu e reunion aki e meta primordial tabata pa sa ken ta gaña ken, agregando cu gobierno a duna un presentacion masha bunita mes riba e proyectonan cu ta den ehecucion y esnan cu ta bay cuminza.
E lider sindical a indica pa e companianan aki basta placa ta wordo genera door di e proyectonan cu ta den ehecucion, y STA ta puntra su mes na unda e seriedad di e companianan concerni ta.
El a agrega cu nan a atende tambe cu e asunto di “trabao barata” pasobra ta casi incomprendible con di diez pa diescinco aña pasa, tabata tin hende den construccion tabata gana bruto, mas di 27 florin pa ora, mientras cu aworaki nan ta gana 17.80 florin.
Kiermen nan ta entre diez pa diescinco atras den aumento di salario, cu mas bien a baha y esaki e sindicato a splica gobierno esaki y cu nan mester bay check esaki, pasobra ta fomentando “trabao barata” sin necesidad.
Otro tema cu a bin padilanti ta e proyecto di “Green Corridor”, cu ta un proyecto mahestuoso, cu ta bay costa mas cu 100 miyon florin.
Diego de Cuba ta puntra con ta posible cu companianan di afo ta participa den e destaho publico y nan ta haya e proyectonan, mientras cu na Aruba tin tur e companianan cu tin tur e experiencia, e “man power” y cu nan mes por haci e trabao.
Segun e sindicalista esaki ta un practica robes y nan no a haya un contesta cu nan por a haya satisfactorio y cu por biba cune. El a subraya cu pa Green Corridor tin dos compania Colombiano cu ta bay maneha e proyecto aki, y e ta lamenta esaki y riba e asunto aki el a mustra Prome Minister na placa chikito, cu e ta busca e companianan aki ta trece nan hendenan.
De Cuba a tuma nota di publicacionnan cu a sali den matutinonan, cu personanan stranhero casa cu Arubiano no ta bay tin mester di permiso mas. El a remarca cu con e ley ta hinca den otro e no sa precies pero pa ta sincero, e hendenan aki ta busca un muher Arubiano, nan ta casa cune y nan ta keda na Aruba, of si nan ta saca na estado e muher Arubano tambe ta motibo pa nan por keda akinan.
El a acentua cu nos comunidad por biba cu esnan cu tey caba, aunke el a bira di mas tambe. Pero no tin mas espacio riba nos Isla pa mas hende di afo. Aworaki tin cuponan di trabao pa, practicamente tur hende, aunke ta wordo papia di cierto porcentahe di desempleo. Pero loke ta sosode ta cu hopi hende no kier traha pa loke nan ta wordo paga, debi cu nan sa cu nan merece mas.
