Steven Max competiendo den Campeonato Mundial di IFCA na Francia
ORANJESTAD (AAN): Danki na e gran dedicacion continuo cu e hoben deportista di aña 2011 ta sigui entama cu fervor, e aña aki atrobe Aruba ta haya oportunidad pa lombra sin igual den Campeonato Mundial di IFCA Youth Freestyle Windsurf na Marseille, Francia.
Den e siman aki, durante cinco dia consecutivo Steven Max, Aruba su deportista ehemplar den ta practica su deporte cu gran motivacion den un equilibrio sano cu su trato amabel cu hende y su dedicacion serio na school, ta batayando pa conkista e titulo di mas halto entre atletanan renombra di tur posibel parti di mundo, incluyendo Rusia, Inglatera, Israel, Hulanda, Belgica y incluso New Caledonia.
E ultimo lunanan pues a consisti di training continuo tanto na Aruba como tambe na Boneiro, despues cu New India Assurance a duna Steven Max su biahe y estancia como regalo p’e sigui tin tur posibel sosten y aporte den ta desaroya su talentonan cu alaves ta yuda pone nos Pais Aruba riba mapa mundial di forma elegantisimo unda cu e bay.
Segun palabranan di Steven Max mes, e ta hopi entusiasma pa demostra cuanto mas el a logra progresa awor atrobe y su mayornan a expresa di ta masha gradici pa e tremendo energia di aprecio berdadero cu Aruba ta demostra na Steven Max.
Tanto pa loke ta e sponsornan DHL, GNC y Malta Polar, como tur otro hende cu ta duna Steven Max nan sosten di curason, ya cu manera nan ta bisa: “ E bon energia aki ta parti di e exito y logronan cu ya Steven Max a sa di cosecha di forma victorioso den pasado.” Den e mes un afan di ta genera un bon energia, den siman cu a pasa, Steven Max a pidi su Main Sponsor Señora Joy Raghunath, Managing Director di New India Assurance Aruba pa bay saca un portret cu ne na e curason grandi di I Love Aruba, bisando cu e Amor fuerte cu e tin pa su pais indudablemente lo dun’e su forsa addicional necesario pa cumpli segun su maximo potencial.
Steven Max a barca for di nos Aeropuerto Nacional, cu un sonrisa y deseonan di hopi exito di Team New India, cu a proclama di tin confianza total cu Divinidad lo ta semper cu ne y cu su acompañantenan pa bolbe trece nan back Aruba sano, salvo y de lo mas victorioso!
