Tabata tin motibo suficiente pa Ricky Croes no ricibi compensacion
Hues a duna Lotto pa Deporte razon
ORANJESTAD(AAN): Den un entrevista haci cu Secretario di Raad van Bestuur di Fundacion Lotto pa Deporte, mr. Benvinda de Sousa, e ta comenta cu Directiva di Fundacion Lotto pa Deporte naturalmente ta satisfecho cu e decision di hues. Lotto ta di acuerdo cu e sentencia di hues, caminda e ta bisa cu no tin luga pa un compensacion pa e ex-director financiero di Lotto, Sr. Ricky Croes.
E punto den e sentencia aki ta kico ta e interpretacion cu ta duna na e clausula nr. 9 den e contracto di trabao di Sr. Ricky Croes. E clausula 9 ta bisa globalmente cu den un caso cu Sr. Croes lo perde su trabao pa un motibo urgente, dus un dringende reden/gewichtige reden.
Si e no perde, si su contract di trabao no worde termina pa un dringende reden/gewichtige reden, e ora ta debe un compensacion di igual na 5 aña bruto salaris.
Sr. Croes den su procedura cu el’a entama pa e logra e schade vergoeding, e ta bisa cu e palabranan dringende reden, pues motibo urgente, y gewichtige reden mester worde lesa solamente bao di dringende reden. Pasobra un dringende reden ta inclui un gewichtige reden.
Di banda di Lotto, e defensa den e caso aki a mustra hues cu si tabata tin un motibo pa hinca den e contract un dringende reden so, no a pone e palabra gewichtige reden tambe. Mester tabata tin un motibo pakico a pone e dos palabranan aki diferente pa termina un contracto di trabao, mr. De Sousa a comenta.
Ora cu hues haya su mes confronta cu dos opinion completamente opuesto na otro, di un interpretacion di un clausula den un contract, e ora hues mester mira den cua criterio mester worde uza pa interpreta e clausula, ya cu e dos partinan aki no ta Sali afo. Un tin un opinion y e otro tin un otro opinion. Esey ta locual cu hues a haci den e caso aki y no a sinta pensa con lo bay soluciona esaki, e secretario a comenta. E tin criterionan poni door di Hooge Raad y el’a uza e Haventext Criteria cu ta worde uza door di Hooge Raad specificamente den e casonan aki.
Ora cu partinan no por sali for di interpretacion di un clausula, hues ta bay mira kico ta e nificacion cu e partinan por a duna na e clausula, na e momento cu nan a cera e contract. Kico nan intencion tabata ora cu nan a hinca e palabranan ey den e clausula. Hues ta bay wak no solamente e aspecto linguistico, pero e ta wak tambe e intencion y e expresion di e partinan ora di a inclui e palabranan ey den e clausula. Haciendo esey, hues a Sali afo bisando cu no por ta asina cu ora cu un persona den e caso aki Sr. Ricky Croes su contract a worde termina y caminda cu hues den ontbindings procedure a bisa cu e Croes tambe tin falta den e hecho cu bestuur no tin confianza den dje mas. Hues a sigui bisa cu den e caso aki door di su mesun actitud el’a contribui na e hecho cu no tin confianza den dje mas. Hues a sigui bisa den e ontbindings procedure, den su sentencia cu pa motibo ey corte ta dicidi cu tin suficiente motibo pa no paga Croes.
Mr. De Sousa a sigui bisa cu den su overweging, hues a bisa cu lo por a busca un manera pa sigui traha cu Croes, pero ya cu Lotto a dicidi pa no haci esaki a dun’e compensacion di Afls. 50 mil. Pero den e hecho cu no tin confianza den Croes, ta Croes mes por yuda. Esey hues den e procedura aki a tuma esey cun’e y a bisa cu den e observacion, den e interpretacion di e clausula ey, no por bisa cu ta pa motibo nan urgente so e ora ey e lo por keda haya su compensacion, pero mirando cu tin poni urgente y gewichtig cu bo por bisa cu e motibo, e intencion di Lotto tabata pa den e caso cu no tin motibo urgente, pero tin otro motibo cu ta pa culpa di Sr. Croes, no ta dun’e un compensacion.
Lotto ta completamente di acuerdo cu e interpretacion ey. Tin cu bisa cu a lesa e sentencia y e hues a tuma su tempo y a splica e Havertext Criterium na placa chikito y a pas’e toe al pie de la letra. Esey ta e motibo pakico Sr. Croes no a haya e schadevergoeding den su contracto. Tur ciudadano cu no ta di acuerdo cu un sentencia tin su derecho di apela. Si Sr. Croes ta kere cu hues a comete un of otro fayo, ta su derecho pa e apela y laga tres hues mira e caso completamente di nobo. Den apelacion e huesnan ta wak e caso completamente for di un comienso, mr. Benvinda de Sousa a termina bisando.
