Tarea di gobierno awor ta controla si contratistanan chikito di berdad ta pagando impuesto
Diego de Cuba lider di STA:
ORANJESTAD (AAN) – Matutino DIARIO a acerca sr. Diego de Cuba, lider di Sindicato di Trahadornan di Aruba (STA), tocante su impresion riba e reunion cu a tuma lugar cu e comision concerni di Staten, riba e tema di “cheap labor”.
STA ta representa e trahadornan di e sector di construccion, y Diego de Cuba ta describe e tarea cu gobierno mester asumi como uno di control riba tur e companianan contratista chikito, pa constata si enberdad nan ta contribuyendo na caha di impuesto di nos pais.
Un control cu mester cuminza no “di ariba bay abao pero di abao bay ariba” loke ta nifica un control mas estricto pa por rescata e sumanan di belasting cu por a bay perdi innecesariamente.
E presidente di STA a bisa cu ta worde menciona un suma di 27 pa 30 miyon florin na impuesto cu pais Aruba cu ta bayendo perdi, y cu nos pais tin derecho riba dje, pues un suma considerable, y e mes a duna un splicacion cortico tocante esaki, y tabata duidelijk cu e asunto aki no ta cumbini gobierno ni e trahador cu a base di un salario minimo no por aspira na un prestamo di banco, y esaki ta algo cu mester cambia.
El a agrega cu e ley cu ta bay worde pasa den Parlamento tin hopi aña cu ta andando. Tambe el a elabora riba un rapport cu ta data di aña 1998 traha pa di hendenan di WAB, y den e reunion aki cu Staten nan a parti copia entre esnan presente, y claro na e miembronan di e comision di Parlamento.
Diego de Cuba ta kere cu ta bon pa tur hende lesa y studia e rapport aki cu ta hopi bon, y bon hinca den otro. STA mes kier a hinca den otro un rapport, pero pakico inventa e wheel atrobe si e rapport di WAB ta papia cla y raspa caba riba kico e problema ta y riba e solucionnan cu por ehecuta, pa drecha e situacion laboral den e sector di construccion.
E reunion a haya feed back positivo di tur skina, incluso a propone pa bin cu un reunion similar cada cuatro luna pa keda vigilante riba e situacion te momento cu e mehora.
