Un fiesta priva a bira publico despues un free for all confrontando y agrediendo Cuerpo Policial
Incidente na Arashi, describi pa Comisario Hassel:
ORANJESTAD (AAN) – Den conferencia di prensa convoca pa Cuerpo Policial (KPA), Comisario señora Trudy Hassel a duna informacion tocante e sucedido na Arashi.
Comisario Hassel ta kere cu ta prudente pa trece dilanti e incidente cu polis a confronta cune den e fin di siman cu a pasa, entre diasabra anochi y diadomingo madruga.
Esaki despues cu un persona a haya un permiso di KPA, pa tene un fiesta priva riba un beach, di 9’or pa 12’or di anochi di diasabra.
Comisario Hassel a señala cu lamentablemente, despues di 12’or di anochi e fiesta a sigui y segun informacion cu KPA a ricibi, e fiesta priva a termina den un fiesta publico, pasobra via blackberry pin practicamente henter Aruba a worde invita pa participa den e supuesto fiesta priva aki.
E fiesta tabata na Arashi specificamente y manera prensa y publico sa caba, despues di esey e situacion a bay for di man, na unda esnan presente, y entre otro, e personanan cu tabata tin e permiso ademas di tur hende cu por a bin, a enfrenta Cuerpo Policial, pasobra nan no tabata di acuerdo cu KPA corectamente, a bay pa pone fin na e fiesta basa riba e vergunning.
Como consecuencia di enfrentamento agresivo contra KPA, dos persona a keda deteni, pero e asunto no a caba akinan, sino cu nan a sigui hiba e fiesta na otro camindanan, por ehemplo Eagle Beach y Niki Beach. Na Eagle Beach e fiesta a keda desmantela rapidamente, pero na Niki Beach seis persona a keda deteni pa un total di ocho.
Locual a resalta na Arashi ta e uso excesivo di alcohol bao esnan presente y di e hubentud cu tabata tey, y e consecuencia cu influencia di alcohol a crea den nan comportacion, cu nan a bira asina agresivo cu miembronan di Cuerpo Policial, cu nan a manda obhetonan den nan direccion cu un di nan ta conoci cu a dal un di e polisnan y nan a destroza auto di polis.
Cuerpo Policial ta lamenta profundamente loke a sosode, Comisario Hassel a subraya. El a haci un yamada encarecidamente, na tur esnan cu ta pidi un vergunning pa tene un of otro actividad, pa mantene nan mes estrictamente na e contenido di e permiso, pasobra si no ta asina den un siguiente peticion e consecuencia por ta cu e peticion ta worde nenga, mirando e maneho general y e seguridad publico.
Comisario Hassel a pidi pa tur hende tene cuenta cu esaki, y cu ora un hende ta invita Aruba henter pa bin participa den su fiesta, esaki ta rekeri di otro vergunning, cual si na e momento ey e persona no tin, e fiesta por worde para pasobra e ta bay contra e permiso cu a worde pidi originalmente.
Comisario Hassel a expresa y reitera loke el a yega di bisa den pasado, cu Aruba a bira un Isla unda cu nos por competi pa un medaya di oro pa cu bebemento di alcohol.
E ta un berguenza pero tambe e tin consecuencia pa salud publico y tambe riba e comportacion general di hende.
